一套「冇間條」叫好叫座，令到「小灣鱷」名利雙收，或者咁講，佢本身都係富豪第二代，冇話名利唔名利，應該係玩咗幾十年，終於有齣好戲畀父母親睇！家族長老「魚柳包」仙遊，但佢同親生大佬「明明」都歸晒位，加埋自己粒仔又夠秤出嚟幫吓手，叫做winwin格局，有冇輸家？睇怕得佢哎吔細佬「危殆」一個！
能力有限 大佬失寵
「魚柳包」一直都諗住由好腳頭嘅「小灣鱷」接棒，唔係咁得寵嘅長男「明明」，由於能力有限，所以只能做副手，收養番嚟嘅「危殆」，雖然做到嘢又孝順，但始終唔係親生，所以點都係排第三。
呢個鋪排都好正路，點知親生嗰兩件唔合作，多年嚟單單「傑作」好似想激死「魚柳包」搵山拜咁款，整整吓，俾「危殆」上到位！
「危殆」又真係抵錫，本身係專業人士，哎吔老竇畀親咩佢搞都掂，其中一役，係當年叫佢上去黃埔灘收拾「敗家女」個殘局，嗰兩年係「危殆」最得意嘅時候，唔止外人覺得佢會取代「小灣鱷」做繼承人，佢都100%相信自己修成正果！
嗰陣成棚人傍住佢，氣燄迫人到爆燈，飲花酒傾生意爭埋單不特止，仲幫埋大家派錢畀啲「女服務員」，派親「人仔」係以「寸」計！
「危殆」返歸 老婆得益
之但係「魚柳包」講到尾都係至錫「小灣鱷」，最尾咪又係乜都畀晒佢，「危殆」失勢後，當堂冇晒酒肉朋友，最大得益應該係佢老婆，個老公無啦啦乖乖哋留番響屋企！咁「危殆」甘唔甘心？只有佢自己至知，但如果想再爭過，似乎應該去搵「小灣鱷」個盲公竹「黑蛇精」指點吓！
[email protected]