花旗股市上禮拜五早段再試高位，但中段跌咗落嚟，繼滙控（005）玩次級按揭貸款業務大幅撥備之後，花旗最大嘅獨立次級貸款企業都唔掂，隨時要申請破產保護令，你話驚唔驚？聯儲局官員話多咗好多人拖數、賴賬。樓價大縮水，唔可以再加按支持消費，經濟會點？跟住銀行要大幅撇賬，盈利又會點？格林斯潘較早前提出嘅經濟衰退警告，都唔係隨口噏㗎。
花旗股市彈咗幾日，成交係咁縮，冇乜力，上禮拜五借啲咁不利嘅消息回軟，睇怕今晚花旗股市都冇運行。亞洲股市呢排都係比美股行先啲，睇見勢色唔對，日股、港股今日都會有壓力，港股上禮拜五已經出現回落嘅迹象，今日恒指加入新成員，每隻股票嘅比重又調整，個市都唔會靜。
工行（1398）同國壽（2628）做咗成份股，價位升到阻力位就有龐大沽壓，咁啱又傳國內會加息，唔理係真係假，都有晒資格做淡友推低個市嘅工具。國內兩會會議喺呢個禮拜五結束，會議結束前，H股或者唔會跌得太深，但之後就唔敢講嘞，因為如果有壞消息，包括加息或者其他宏調措施，好可能喺會議後出台。
恒指P輪3515：美股今晚大幅大挫嘅機會唔細，港股今日多數會跌先，又可以再次吼恒指P輪3515。恒指跌穿19000之後如果爬唔番上去，好大機會要試18700，到時睇吓美股有冇反彈先決定食唔食糊。3515上禮拜五收20.3仙，槓桿率13.5倍（有效8.6倍），對沖值0.637，恒指跌到18700，3515會喺24仙樓上，指數下試18500，隻輪會有3成升幅，恒指升破19500止蝕。