今日截止公開認購嘅銀泰百貨（1833），可能好多讀者都有入票抽番一兩手，但大家喺入票前，有冇認真咁睇過本電話簿咁厚嘅招股書呢？華華發現，呢間浙江省地頭蟲銀泰，話會將部份集資所得用於省外擴張，但實情係，佢哋未試過喺浙江以外地區成功過！
招股書第122頁寫到明，佢哋嘅最終控股公司曾經喺瀋陽、大連同重慶開過銀泰，不過唔知因為乜嘢原因，三家分店分別喺02年7月、05年12月同埋06年8月，先後結業或將業務出售。唔知係咪呢個原因，現擁有五家分店嘅銀泰，05年打後開嘅四家分店都開喺浙江。
高層都係嗰班人
你可能會話，呢啲係母公司問題，都唔關銀泰事啫。但睇番銀泰個board，銀泰主席沈國威，喺06年已出任母公司銀泰國際嘅主席，斷估之前應該都身居要職，而招股書列出嚟嘅五位高層，其中4位喺銀泰國際都有post，咁又可唔可以話唔關銀泰事呢？
講到呢度，華華諗起華富嘉洛董事林少陽喺1月嘅蘋果投資論壇上曾經講過，若果會睇基本因素嘅人，係唔會去認購新股嘅……咁，大家自己諗啦！
[email protected]