無綫新春期間在翡翠台播出林文龍和郭可盈主演的倉底劇《十兄弟》，該劇前晚播出大結局時，配角駱應鈞竟爆了一句「call我」，民初劇講英文，認真貽笑大方。無綫常強調「全力以赴，做到最好」，《十兄弟》卻出現這個笑死街坊的錯誤，莫非有份審批的部門都睡着了？
無綫兩年前拍竣的民初劇集《十兄弟》，去年已在其收費頻道播放，在剛過去的新春期間再被安排在翡翠台播放，這齣倉底劇前晚播出大結局時，劇中竟然有一個很大的「蝦碌」。出現蝦碌的戲份講述駱應鈞到林文龍家賞月時，他邊行邊說：「賞月食糖水，咁遲至call我哋。」
駱應鈞：係我噏錯
《十》劇背景發生在民國的軍閥割據時代，部份中國人懂英語不足為奇，但總不會前衞到有現代人的慣常潮流用語，顯示出無綫審查制度頗兒戲。無綫每齣劇播出街前，必須經過監製和做後期的各部門審視，最後把關還有一個「電視條例及守則科」部門，但《十》劇中這個錯漏還可以出到街，證明各把關的部門都走漏了眼，無綫的把關制度也形同虛設。
《十》劇監製潘嘉德昨日在電話中回應說：「呢齣劇已經係兩年前嘅作品，究竟有冇出現呢個英文對白，我都唔知道，因為我仲未睇番播出街嘅版本。如果真係有錯，我會盡快改正番，免得齣劇再重播時，繼續錯落去。」潘嘉德事後看完出街版本後，他仍死撐說：「我同助手重複睇咗幾次，確唔係講個call字，佢係話：『咁遲至叫我呀！』駱應鈞係話叫，唔係講個call字喎！」
駱應鈞昨日被問到此事說：「今日我收到朋友嘅電話，已經知道呢件事，但呢齣劇拍好咗咁耐先出街，𠵱家你問我記唔記得有冇講呢句對白真係記唔起啦。如果係有，可能係因為嗰陣我同成組人拍到暈晒，自己一時口快講咗出嚟，不過有一點我係好記得，劇本係冇英文對白嘅，所以有錯都係我噏錯啫。」
郭可盈離開無綫
此外，郭可盈和林文龍兩夫婦前晚相約了《十兄弟》的演員胡定欣、李彩寧與羅貫峰等到其寓所匡湖居之私人會所一起食飯兼看大結局，郭可盈說：「今晚我請大家食飯睇大結局，如果下周公布收視好成績，希望監製同我啲仔女可以請食飯啦。」她續說：「拍完呢齣劇後，我同無綫就再冇合約，所以我會去美加同內地接其他騷嚟做，喺公司咁耐，𠵱家我反而想回復自由身，做一啲自己鍾意嘅事。」問到她與文龍何時生BB？她笑言：「我同老公已經有共識，等我keep好個身體先，唔需要操之過急。」
採訪、攝影：卓寶花、卓美娟
「十兄弟英文對白？」網址：
http://www.youtube.com/watch?v=5OmsC-cck4w
