如果財政許可，相信好多人買樓都會揀高層，貪佢高人一等又靜啲。不過，網友nimrod喺《香港討論區》現身說法，話住高咗反而覺得仲嘈，「買樓如果買着2至5樓等低層又對住馬路，應該會比較嘈；但買得高都一樣嘈，因為聲音會向上走，越高嘅地方，會越多雜聲，連遠處嘅車聲都嘈到你，反而中層單位會好少少。」
住緊高層嘅網友感同身受，話離譜到連樓下超市推車仔嘅聲都聽到。socho仲誇張，「有次睇樓，成60樓，點知『9里』外嘅屋苑裝緊修都聽得一清二楚。」
bimanhot好學術咁解釋：「你面向你個朋友講嘢，前面聽得清楚啲，後面都聽到，不過冇咁大聲，點解？因為你個人阻礙咗一啲聲波。
有人覺得低層或者中層好似細聲啲，其實可能係你嗰層有障礙物，亦有可能係好多不同來源的聲波互相抵銷。」
szefly就話：「低層基本上係嘈啲，但你嘅聽覺系統會將收音嘅能力降低，聽一啲環境聲就會變細；當喺靜嘅環境，聽覺就會敏感啲，所以細細聲都會變得好大聲。」
裝隔音玻璃一勞永逸
一般嚟講，樓層高度同嘈音比例應該成反比，不過唔好忘記，香港係一個繁榮鬧市，聲音亦唔一定由下面傳嚟，就算住喺50樓以上，都唔代表可以完全脫離噪音。真係頂唔順，可以花少少錢加裝隔音玻璃，咁就可以確保有一個寧靜嘅環境嘞。