就算以往如何被外界誤解，GiGi總認為事不離實，不用多作解釋，但現在她發現當一個謊話被人講了100遍，人家就會信以為真。
GiGi說：「有件事我係幾耿耿於懷，記得幾年前一直有傳聞話我對空姐唔好，寫信投訴一名空姐，令到呢位空姐俾人炒咗。但事實真相係當日我喺飛機上瞓緊覺，有位空姐整醒我，然後要求合照，當時我話自己𠵱家好攰，個樣又睡眼惺忪，所以我同呢位空姐講『𠵱家唔好影住得唔得，我仲想瞓多陣。』之後我繼續瞓。
「後來又嚟咗個着唔同色制服嘅空姐問我，頭先係咪有空姐騷擾我？我話『我𠵱家淨係想瞓覺啫！』之後嘅事，我真係唔清楚，更加冇寫過信去投訴呢位空姐，佢俾人炒，當時我真係唔知情。」