近年梁詠琪唱歌少了、拍戲少了，在樂壇頒獎禮又「食白果」，人氣自然跌，她說自己長大了，不再計較獎項，但是對於唱片公司華納，她揚言不滿意。
「我係心淡」
GiGi說：「我同華納就嚟約滿，仲有一隻廣東碟暑假出，講真我係心淡，雖然講唱片巿道大氣候唔好，但某程度上，公司係令我失望，我覺得自己用心做咗唱片出嚟，公司應該幫手宣傳，唔好抹煞我嘅努力，但係我嘅歌連喺卡拉OK發表嘅機會都冇，我明白我嘅經理人約唔屬於唱片公司，當初我都收咗一嚿唔少錢嘅製作費，我唔會怪公司，我𠵱家可以做嘅，就係希望快啲約滿。」
除了唱片合約屆滿，其實GiGi與台灣福隆公司的經理人合約也於今年中滿約，最近已經有內地和香港的公司向她招手，她說：「呢輪係有幾間公司同我傾合作嘅事，我都要睇吓邊度畀到我有長遠發展再作考慮。」
至於電影方面產量少，因為GiGi不想接爛片，她說：「拍戲嘅機會唔係冇，講真好大製作嘅又未必輪到我拍，太差嘅戲我又唔想接，講真我演戲嘅profile都幾漂亮，我梗係想揀啲有quality嘅戲嚟拍。」
內地搵真銀
雖然歌影發展都停滯下來，但這兩年GiGi收入卻勝從前，因為她不停在內地搵真銀，她說：「呢兩年搵錢真係多咗，𠵱家內地好多商演，唱幾隻歌幾十萬，都幾好，不過我嚟嚟去去都係唱舊歌，好似《短髮》、《膽小鬼》咁，有時我喺度諗，其實我係咪唔需要再有新歌呢？」