荷甲班霸燕豪芬憑中堅阿歷士洛里高（阿歷士）「包辦兩粒」，喺周三歐聯16強次回合作客阿仙奴踢成1:1，總數贏2:1晉身8強；不過，如果喺周五嘅歐聯8強抽籤，燕豪芬抽到對車路士，阿歷士可能無緣上陣，因為原來車仔有佢部份擁有權。
阿歷士今仗喺後場一個踢晒，偏偏喺58分鐘「擺老烏」幫兵工廠領先；猶記得04/05球季，佢又係喺主場鬥阿仙奴時擺烏龍，搞到燕豪芬輸0:1，唔知佢有冇諗過「何必偏偏選中我」呢？不過，命運輪盤終於幫番阿歷士，完場前7分鐘佢接應罰球頂成1:1，由罪人變功臣！
如果燕豪芬喺周五嘅歐聯8強抽籤抽中對車路士，阿歷士可唔可以上陣都未知；因為燕豪芬同車仔係姊妹球會，車仔有阿歷士部份擁有權，車仔可隨時唔畀阿歷士披甲呀！如果係真，燕豪芬主帥朗奴高文就要發揮小宇宙喇！因為佢專剋英超隊，02/03球季帶領阿積士壓倒阿仙奴；舊年幫賓菲加收死利物浦，今年又再擯走兵工廠。
另外，我求大俠當然講吓呢場波另一焦點孫祥，佢係首個中國人喺歐聯正選兼踢足全場，可惜踢左閘嘅佢成球隊缺口，任過唔嬲，希望佢明天會更好啦！