昨日港股好友同淡友各贏半場，恒指大部份時間都錄得升幅，但係淡友尾市發力，恒指下跌40點收市。單睇指數嘅波幅，一定以為個市好靜，其實唔係咁，成交有接近630億元，尾段好淡搏鎚好激烈，除咗為下禮拜一部署之外，應該仲包埋基金嘅換馬活動。
下禮拜一恒指會唔同晒，總數38隻，加入工行（1398）同國壽（2628），恒指成份股嘅比重會同時調節，大戶舞動指數嘅方式又會多幾瓣變，所以大家睇指數變化，又要留心啲，睇吓大戶有乜新招。
呢幾日個市反彈，兩隻新貴節節上升，但對恒指冇乜影響，因為仲未計得數，咁啱下禮拜一就做恒指股，昨日佢哋就俾個技術位阻住，仲好大沽壓，如果下禮拜一真係推低兩隻新貴影響啲指數，咁就唔可以唔讚吓「揸𨋢」嗰位仁兄嘅功夫，反彈同插落嘅時間校得啱啱好。
其實俊樺都想做好友，做好友介紹C輪，贏錢皆大歡喜，所以免得過都唔介紹P，搵錢啫，C同P有乜關係？不過，睇晒啲圖同環球股市嘅走勢，買C嘅值博率唔係好吸引，同埋要跑超短線，今朝買咗你唔沽，晏晝或者第二朝已經輸錢，反彈市買C其實轉身要好快，堅持只賭C輪，提高值博率都係要候低買。
長實C輪4650：長實（001）昨收94.70元，升咗2.3%，個「錘頭」幾靚，但係啱啱頂正10日線，等佢落番嚟試番92元，如果守得住，就買C輪4650，博賣地之後炒番上去，正股睇95元。正股下試92元，4650應該喺18仙，正股企得穩，買番啲4650，槓桿率33.2倍（有效13.5倍），正股升上95元，隻輪應該見到30仙，正股跌穿90.50元止蝕。