濠江賭業日見興旺，美國佬亦紛紛到來分一杯羮，下半年又有多1間大名鼎鼎賭場開張！雖然越嚟越多美資賭場出現，但論到各大場所最受歡迎項目，非大部份人士都認同有路可捉嘅「百家樂」莫屬。賭波嘅亞洲盤之所以受歡迎，相信原因亦然。
「單跳」、「拉長莊長閒」、「有黐冇黐」、「大眼仔」等，「百家樂」數埋就已經有幾十種唔同嘅路等你捉；亦冇話好似「大細」咁，整個圍骰出嚟通殺，開個「和」最多再嚟過。賭仔自不然心理上好過啲，又有捉路把握，所以你去到賭場見到最多人圍埋玩嘅，永遠係「百家樂」。
亞洲盤情況一樣，每支球隊都有自己盤路，長贏長輸、單跳、贏兩口輸1口等情況亦常見。基本上係唔使理各支球隊每場比賽要讓或受讓，齋睇條盤路走勢去捉路，已經OK。
唔理強弱隊都有路捉
無論係戰績表現幾咁強勁嘅球隊，例如巴塞隆拿、曼聯、國際米蘭等勁旅，抑或韋斯咸、皇家蘇斯達、帕爾馬等踢極都冇起色嘅榜尾分子，盤路贏輸出現情況，都唔會有特別大嘅分別；因為每場比賽，莊家都會為對賽兩軍秤出個最接近嘅盤口，每支球隊都有權出現特別盤路。
國內唔少足球網站，喺球隊盤路往績列表中，更特別花心思，整到成張「百家樂」路紙咁，幾盞鬼㗎。
文：華度