羅傑承旗下嘅BMA娛樂公司前晚喺君悅酒店舉行春茗晚宴，鍾鎮濤（阿B）仲即場舉行簽約儀式，簽咗兩年經理人同唱片約。阿B以一哥姿態成為全晚焦點，祝酒嗰陣就同伊健分別企喺羅傑承夫婦兩邊，好受重視。
樂易玲興奮拍掌
阿B女友范姜同前女友樂易玲都有到場，幾個人有傾有講，非常融洽，仲大方合照。阿B又搵埋溫拿嘅彭健新同葉智強一齊夾band唱五首歌，樂易玲喺台下睇騷嗰陣都興奮到手舞足蹈，十足小fans咁。
雖然阿B成為BMA一哥，但佢見到同公司嘅周麗淇同鄭伊健都叫佢哋做師兄師姐，仲話：「羅傑承好似老竇咁，即使佢細我好多，佢話會親自幫我安排工作，呢度個個都對我好好，冇蝦我係新丁。」
林珊珊就話欠咗阿B一個大人情，會好好對佢，似乎講緊當年佢介紹章小蕙畀阿B認識單嘢，阿B就話：「我唔諗啦，總之日日是好日。」至於同樣係新加盟嘅車婉婉，前晚只被派擔任司儀，林珊珊喺台上話：「我收到羅生訊息，你嘅簽約儀式喺下年春茗時補番。」不過婉婉都唔介意。
劉小慧五月生仔
此外草蜢嘅蘇志威（阿細）同大肚老婆劉小慧一齊嚟，小慧會喺五月擇日開刀生仔，到時草蜢嘅新加坡同內地巡迴演唱會都會延後一星期。
