美國財長保爾森開展東方之旅，風塵僕僕之餘，更不忘大派定心丸──若不是保哥仔開金口，周二美股未必能大幅反彈。然則，這畀面派對只出現了一日。不是「大鱷」陽奉陰違，實在是有點難為，因為橫計掂計，又點買得落手？
瞧瞧無論經濟、樓市、通脹、企盈、消費、投資等，瓣瓣不是放緩或倒退，便是極不明朗，投資唔睇fundamental，難道日日劃chart（技術走勢）或攞住個羅庚做人，甚至聽人支「笛」？若然，這自我價值何存！
講起價值，保爾森真乃布殊內閣中最有價值的猛員之一，此君可以放棄高薪兼華爾街「美超聯」大行一哥唔做，毅然轉而為牛仔總統護駕（估計薪酬僅及在高盛的1%），打從上任至今，其表現有目共睹。如果唔係保哥仔夠江湖地位兼且有牙力，這個已不知是甚麼世界了！
此外，據台灣《蘋果日報》1月份時報道，熱愛大自然的保爾森揚言不會把所有財產留給孩子（因為太愛他們），反而計劃將擁有的8億美元（約62億港元）財產大部份捐出，投入包括草原、濕地及瀕臨絕種的珍稀鳥禽之環保及保育工作。如此高尚之情操，這價值又如何計算？
每年兩次的「中美戰略經濟對話」乃保爾森一手促成，東西方兩經濟大國能加強合作，確保全球經濟健康穩定發展，實乃世人之福。第一輪對話於去年在北京舉行，第二輪則安排於5月在華盛頓展開，亞洲對世界經濟之影響力越來越大，保爾森這次走訪中日韓，筆者認為主要是談滙率──不管是利用日圓搵食之套息交易投資者拆倉，抑或美元滙價波動從而衝擊債市，甚至人民幣滙率問題產生的貿易磨擦（民主黨以此作為攻擊共和黨及中國之武器），若處理不善，必直接或間接為全球帶來深遠的負面影響。保哥仔，睇你啦！