睇過最近幾場波嘅賽果後，車路士對熱刺絕對係五五波，不過，作為車仔球迷，加上有主場之利，我會估車仔主勝，但係佢哋好難贏到兩球以上，所以我同時要「讓球主客和」「和局」！
車路士贏波圖、樸茨茅夫、阿仙奴，以呢3場波嘅狀態，車仔贏在有運。佢喺足總盃還可以，至於歐聯，車仔入到4強已經要還神啦！聽晚對熱刺，車仔無泰利，搞到艾辛要打後衞，本來佢係可以做一個反守為攻嘅靈魂人物，唉……可惜！至於林柏特近況更加麻麻，對住波圖密集防守，佢完全做唔到嘢！
我覺得車路士今年有聯賽盃已經收貨啦，足總盃可以行幾遠，我做球迷都無信心！睇吓對手熱刺，廸科爾、貝碧托夫、羅比堅尼、贊拿斯、艾朗連儂等等，人腳絕對拍得住車仔！加上熱刺打整體，相比起車仔啲個人突破，我會睇熱刺嘅中場線高少少。不過，因為我係球迷，感性上要支持車仔！另外，巴塞對皇馬，我就睇高主隊少少啦，而米堡對曼聯，大家亦可以冷敲主隊！
周鵬
商業1台《球迷集中贏》主持
電郵：[email protected]