漫畫版《GhostRider》揸嘅係哈利FatBoy，噚日先喺香港上畫嘅電影版就潮得多，雖然影帝尼古拉斯基治造型跟哈利毫不相襯，更被哈利迷批評得體無完膚，但戲內嗰架Chopper大幅偷空兼三尖八角，車轆仲曉着火，補番條數！問過本港哈利代理嘅總經理James，佢仲話其實真車都可以改成咁，不過改裝費隨時要過百萬！
記者：咀嚼爺
攝影：譚盈傑
烈火戰車解構
車太型人太呆
變身後，得個燒着咗嘅骷髏頭，襯埋一架一樣會着火嘅全電鍍Chopper，型！但衰就衰在變身前，阿主角尼古拉斯基治一副慈父樣，唔夠邪唔夠魔唔夠反叛又唔夠Rock，騎喺架Chopper上面真係唔多掂！不過咁，華弟着套白色老西戴個花碌碌頭盔揸Fairing咪一樣唔襯，所以架車型過個人係唔出奇嘅，可惜筆者問過幾個睇咗優先場嘅朋友都話最大鑊係選角問題，佢哋仲話套戲入面嘅尼古拉斯基治好似Take咗「E仔」咁呆呆滯滯，毫無霸氣可言。
CG夠精采
改鬼車要過百萬
主角唔夠霸氣啫，之不過架幽靈戰車真係改得幾型喎！哈利香港代理嘅總經理James雖然未睇《幽靈車神》，但對戲內兩部哈利就有啲意見：「變身前嘅Chopper改過，前Fork、油缸都改細晒。」改成咁仲認得係哈利咁叻？「哦，副V偈係哈利出品嘅，不過我睇唔出佢呢部車係由咩型號改成，應該唔係現有型號，因為哈利啲舊車都有用V偈。𠵱家潮興改闊胎，戲裏面嗰架就改咗幼胎，少有啲。」照James講，香港都有啲Chopper友鍾意好似將架車偷空，改高啲再向前叉，不過日本就最多。
至於變身後着晒火嗰部，諗住James梗會嫌佢超現實啦，點知佢話凡事有可能：「喺美國都見過類似嘅Chopper，成架車改到三尖八角，戲內鬼車雖然連前叉連避震都冇，但其實真係有人改到唔要避震，都行得㗎，不過震啲之嘛。我諗如果要改成咁，要過百萬都唔出奇！」當然，唔包着火。
哈利迷點睇？
陳仔：「揸哈利真係要有格，否則好似戲內車惡過人就弊！部戰車偷空到得番棚骨，真係好型。」
Mike：「主角造型認真麻麻，反而架戰車型得多，好多㗎仔都係咁偷空架車。」
Johnny：「主角似道友多過英雄，失敗！若然架鬼車改到好似車書入面咁頭Fork超長，要舉高晒手先揸到，肯定更型！」
哈利車神推介
查詢：TechnoHarley-DavidsonHK（28068444）