各位打開手袋、背囊，隨身電子玩意3、4件，仲有iPod、NDS、PSP，有時要追劇集動畫，帶埋PMP喺身邊，負擔都好重㗎，要玩要潮真係要唔少代價！不過有咗SPEED最新出呢部萬能DC仔DX9，除咗係DC，又有PMP功能，加埋遊戲機Function，拍得聽得玩得，20隻遊戲玩落又似足PSP，咁多玩法，差啲連過馬路都忍唔到手！
記者：許福合
攝影：陳盛臣
ImageGirl：Fion
樣似NDS玩落似PSP
雖然DX9百足咁多爪，功能多多，不過要數當中最特別係內置20款遊戲，可以打埋機！只要從機身揭起個芒，望落去真係成部NDS咁款，只差在無NDS雙芒設計，不過手感真係可以假亂真！而且機身仲因應打機功能，特別加入十字掣同PSP式按鈕，加埋個3吋大芒作顯示，玩落真係幾似PSP，唔同係缺少咗R同L掣，搞到揸部機兩隻手指唔知放邊好！遊戲方面就唔似得NDSPSP咁可以換碟插卡，所有遊戲都係內置於機身內，數量有20種之多，以畫面質素來講，雖然難與PSP比較，不過放埋NDS側邊，都可以一較高下。而遊戲種類有好多，由射擊、動作到桌球都有，等人搭車都絕對唔怕悶喇！
必玩遊戲
DeepStorm（射擊）
估唔到DX9都可以玩到立體射擊遊戲，質素似乎比NDS部份3D遊戲仲要好。
PoolPro（桌面）
雖然係旋球系統，只能設定發球方向同力度，不過撞球聲音實在好正，好有現場感。
FinalEscape（智力）
畫面有啲似炸彈人，主要玩法用磚撞怪物，消磨時間幾啱玩。
Plumber（動作）
一款橫向動作遊戲，地圖就好似迷宮一樣，地面有陷阱，會掉到下層地圖。
GetTheMeet（智力）
角色係個原始人，要不斷喺無數山洞中前進，收集肉類作糧食。
按鍵實淨3吋扭擰芒
DX9真係好輕，只有137g，比唔少手機仲要輕，而機身大小亦夠的骰，合埋屏幕同卡片機差唔多，放落手袋褲袋都好輕鬆。近排唔少高檔相機都以3吋芒做標準，DX9屏幕亦都睇齊，解像度960×240，唔錯喇！影相拍片時，屏幕實用又好睇，除咗夠大，可揭起前後反轉，自拍或影人影景都好啱使，尤其係高影低炒角度，扭一扭個芒，唔使爬高爬低都一樣影得到心目中相片。有人擔心，成日咁擰，會唔會好易爛㗎？呢點又唔使驚，若你摸過DX9，就會感覺機身好實淨，絕非相機仔貨色。
5大功能集一身
數一數，DX9基本就已經有5大功能，打機、影相、拍片、聽歌同PMP，個別功能都算標青，不過勝在樣樣齊全，一機就玩晒！先講吓拍片，最高可輸出到千萬像素相片，不過要留意係用500萬像素CMOS插值而成，質素估計會比CCD型號多咗啲Noise！筆者反而睇好佢拍片功能，DX9可以拍640X480MPEG4，若只以解像度比較，已經同DVD有得揮，而機身仲特設有補光燈，減少同類機種室內拍片光度不足嘅情況。
剩下嘅聽歌同PMP功能，用家就記得先買張大GBSD卡，DX9最高可認到4GBSD/SDHC卡，將心愛MP3同影片放入卡，就可拎出街慢慢歎。
小測試
DX9單以拍攝時反應，其實都唔算差，尤其屏幕畫面顯示相當爽快，與數千元機種分別不大，只係始終使用CMOS作感光，雜訊比較多，測試相片由尖沙嘴影過對面海，顏色上有粒粒，層次感略為不足，顏色尚算準確。
Profile
感光元件：500萬像素CMOS
變焦：最高16倍數碼變焦
屏幕：3吋 電源：專用鋰電
記憶卡：SD/SDHC/MMC
體積：97×70×37mm
重量：137g
查詢：領先視聽中心
（25721822）
記者意見
記者本身有齊NDS同PSP，不過對DX9遊戲功能都好有興趣，因為甚少多用途機種做得咁認真，設有專用來打機按扭，而遊戲本身畫面同聲效都做得唔錯，可以一玩！以價論機，DX9開價$1,580，同部PSP差唔多，雖然畫面唔及PSP咁靚，但可以影相又拍片，玩法比較多。
總括來講，DX9適合貪心嘅用家，每種功能都想有就最好！
Bytheway
土炮貨即港產電子產品，最怕是打開內裏亂七八糟；DX9功能多，但要數它好，就要即場打開：它沒有SONY的多層式底板、縱合式電路膠帶，這就好了，DX9簡單編排，功能多、用料合格，方便維修，是SmartBuy；電子產品缺點是壞機，不論多先進或來自名廠，兩三年、四五年，一定壞掉。
香港沒有高科技技術和人才，要維修日本先進電子產品，根本是天馬行空，檢查也不知哪裏出毛病，所以整完又壞的問題，在香港很常見。
DX9善用電線和插頭式接駁，底板和機身用十字螺絲穩固，Simpleisthebest，這種Simple有2個好處，壞機不擔心高昂維修費，另一個是價錢平，扔掉買部新款，不肉痛也不可惜，幾瀟灑呀，Verysmart。
文：伍旋卓