證券行股金榜集團（172）上月停牌，噚日復牌即大升59%，因宣布出售旺角金都商場地庫至3樓若干商舖單位及外牆廣告位，總代價5.3億元，錄得3000萬元賬面收益。金榜市值只係5.1億銀，出售套現所得，仲大過公司市值，或因此令股價單日勁升。
有關物業去年9月管理層至話無意出售，未夠半年又改變主意。要結婚嘅人都知道，金都係結婚相關舖頭嘅集中地，人流極旺，舖租唔會平。金都物業截至去年3月底止年度已扣除稅項及特殊項目後純利為3888萬元，即係大約以13.6倍PE出售。基於金都唔係普通商場，出售事項對金榜並非太過着數。
失去主要收入來源
據通告表示，將出售所得其中1.544億元償還按揭貸款，1200萬元償還銀行信貸，及用最多1億元作發展及擴大金融服務業務，餘下作一般營運資金，其實等於無迫切資金需要。其實金榜月前才宣布，計劃收購湖北省天然磷礦探礦權，但由於賣方需要更多時間進行鑽探，經考慮所需的額外時間後，金榜決定終止收購協議。
睇番金榜近幾年業績，純利都係維持2700萬銀左右，扣除咗金都商場嘅租金貢獻，即係其他業務表現乏善足陳，出售金都後，除咗靠金融業務外，就係靠國內南京廣場地產項目、武漢開展的典當業務，以及國內嘅貸款擔保。喺國內做典當生意，唔見得會好發達，由於公司主要收入來源冇咗，未來業務收入又未有保證，單係炒賣金都套現，未必支持股價升勢好耐，而證券行股，一般都係轉型收場，且看金榜大套現後仲有乜搞作？