H&M今日正式開業，氣勢可謂一時無兩。3月8日當晚就率先大搞8折GrandOpeningParty，件件幾百蚊貨仔有款再有折，全城出席人頭過千。估不到畀面出席的潮人明星都多不勝數，個個一袋二袋掃得滿載而歸。今日排隊之前，不如睇吓佢哋買咗啲乜，又有咩心水推介畀大家！
記者：許維雅
攝影：黃子偉、何家亮
嘩，為慶祝全亞洲第一間專門店開幕，H&M於開舖當日3月10日上午11點開始大派禮物造勢，送出20件娜姐簽名TrenchCoat、500副MbyMadonna太陽眼鏡，截稿前已有人排緊隊，想免費得到偶像設計的禮物，快啲擔定櫈仔排隊啦！
徐濠縈：「我一向有買開H&M啲嘢，着梗呢件Viktor&Rolf特別版都係上eBay買。去到外國就最鍾意買佢哋啲SkinnyJeans，我推介咗畀好多朋友。佢哋嘅SkinnyJeans夠平之餘，Cutting又靚。至於MbyMadonna雖然靚，但就唔係咁啱我Style。」
何超儀：「H&M來港開舖，對香港旅遊業絕對有幫助，因為吸引亞洲遊客之餘，對我呢啲瘋狂H&MFans嚟講，每次去歐洲都會花一半時間去H&M掃貨，但𠵱家只要落中環就可以買到，唔使搭飛機，真係好方便。我自己特別鍾意H&M的BasicItems，因為貪佢襯衫容易。」
Wyman：「我喜歡H&M，但你要我推介H&M嘅嘢，我一時間又講唔出，不過我一定會買到嘢，因為我好識得喺一間店舖入面搵一啲我喜歡嘅小物。至於今年嘅MbyMadonna，我只可以話佢嘅才華並唔喺時裝之上，亦只怪佢排咗喺Viktor&Rolf之後，幾慘㗎！因為上季H&M同Viktor&Rolf合作得太出色，係最完美嘅組合。不過，如果你係Madonna嘅Fans，即使佢用嚟抹嘴嘅紙巾你都會喜歡！」
黃佩霞：「我好鍾意MbyMadonna呢條line，啲Style好啱我，我都係鍾意啲貼身Show到BodyStructure嘅衫款，我未有時間睇衫，但我會買MbyMadonna嘅黑色DeepV連身裙。」
周汶錡：「我特別鍾意飾物，款式靚又夠平。今次就睇中MbyMadonna白色TrenchCoat，款式靚得嚟夠Basic，永遠都唔會Out，年年着都得。」
馬詩慧：「H&M啲嘢真係好平，我多數買啲Basic嘅黑黑灰灰款式，線條簡簡單單，好易襯！我揀中好多嘢，最喜歡呢件外套。」
熊黛林：「我好多嘢都好鍾意㗎，呢度有太多唔同款式選擇，件件都好靚，最喜歡就係呢條黑色連身裙。」
AnnaR：「H&M啲嘢又平又靚，加上我係Madonna嘅superFans，所以我一定會買MbyMadonna條Line，我好喜歡嗰件黑色皮褸同直間Scarf。」
陳嘉容：「好靚呀！今季啲嘢好靚，我睇中MbyMadonna嘅白色西裝，我覺得每個人屋企都要有一套黑色同白色西裝套裝。」
成個中環，都係娜姐！
我絕對相信於中環、尖沙嘴返工的人士，都會俾H&M的宣傳嚇死，娜姐好似AgentSmith咁，地鐵走廊的廣告牌、大堂電視、地面及柱位周圍都係佢。廣告清一色展視娜姐為H&M設計的07年別注版系列，更開創先河件件寫上價錢，慌死你唔知H&M以平掛帥。連有娜姐嘜頭都係幾嚿水就有交易，莫講潮人、Fans引頸以待，香港人即使未接觸過H&M，都顯得心郁郁！
問：傳聞唔係娜姐親自設計？
我可以話畀你知我哋見面好多次，娜姐講出佢要嘅款式同Style，再由佢親自指導邊度要修改，最後整條Line嘅作品都係佢最鍾意，由頭到尾都係佢嘅構思，唔通咁都唔叫由佢設計？我哋仲未決定下一季會同邊個合作，但每一次Crossover都合作得好愉快。
問：點解廣告寫明價錢？
要有效宣傳，最重要係認清自己品牌賣點。H&M以平價售賣時尚及高品質見稱，所以我決定將所有廣告牌標籤價錢。好似Madonna嘅廣告，如果冇H&MLogo同價錢，大家可能以為其他名牌廣告。仲要夠集中，所以刻意集中所有廣告於中環地鐵店內，令人一見難忘！
店舖查詢：
H&M（21109546）
中環皇后大道中68號地下
潮流街坊：Zara受威脅！
前ZaraSalesHazel爆料：福利好過Zara！
「成班仲喺Zara做梗Sales嘅朋友知道H&M喺香港開，大家都好緊張、好興奮，因為好多人都想跳槽過去做。Zara啲福利Cut吓Cut吓越嚟越差，H&M頭一年開，福利一定好好多，起碼有13個月糧。不過，我啲朋友見完工就話H&M要求好高，英文要求十分流利，要加入都並非易事。我一向有搭朋友喺英國買H&M，今次香港開第一間專門店，加埋第一批衫有Madonna造勢，一定會大受歡迎，我都一定會去睇吓。」
Candy：「我係H&M一級Fans，以前喺加拿大買好多。返香港有搭人買StellaMcCartney條Line，朋友話排隊排到癲咗。可以用咁平嘅價錢買到名牌，梗係受歡迎啦！有買Zara嘅衫，但有H&M就會買少啲，因為Zara啲款偏成熟。Madonna條Line應該大把人搶，你可唔可以幫我買？」
Ethel：「我做咗時裝多年。喺外國Zara就似Esprit，H&M就似Giordano，係好Cheap嘅牌子，但款式抄得好好，好Fashion。本來Zara嘅Grade好過H&M，我幫襯好多，但香港開咗後啲質素越嚟越差，尺寸又唔啱，將貨就價，所以𠵱家唔買！相反，H&M呢兩年做得好好！」
吳小姐：「我知有呢間新舖，因為啲宣傳好勁，成個地鐵站都係。但我就未買過佢哋啲嘢，唔識個牌子，不過都會去睇吓。」
Apple：「之前喺英國住過有幫襯，款好Fashion價錢又夠平。一定會去買娜姐條Line，覺得好有型。好欣賞佢哋嘅宣傳手法，成個地鐵站都係，好犀利！」
更正：2月24日刊出《全球最輕摺車》一文中，報道有網友提出「A-Bike同廠內銷版本叫N-Bike，價錢大約1500人民幣左右。」查N-Bike並非A-Bike同廠出品，特此敬告讀者。