股海翻波，但對見慣風浪嘅彤叔鄭裕彤（圖）嚟講，不過係小風波，無阻佢shopping嘅興致，中糧控股招股、中信銀行上市、大埔賣地，佢全部都話有興趣。
華華噚日喺香港珠石玉器金銀首飾業商會一個記者會上見到彤叔，講起股市，佢話上年升幅唔小，今年應該唔會再大起大跌，所以都唔擔心，會繼續認購新股，對中糧、中信銀行都有興趣，最緊要睇吓有冇潛質。
呢幾日中糧招股，咁佢認購幾多呢？彤叔竟然反問今日招股咩？真鬼馬。佢話要睇吓分析報告先決定。嗱，彤叔認購都一定做功課，散戶要學吓，咪人買你買，自己買咗乜都唔知。
除咗買股票，買地皮都係彤叔杯茶，下個禮拜大埔有三幅地皮拍賣，佢話三幅地都有興趣，至於定期拍賣好定係勾地好，就見仁見智，佢冇乜意見。反而對今年新落成住宅單位只得萬二個多啲，佢話太少喇，今年經濟向好，樓市穩定，因此估計樓價會升8至10%，新世界會睇情況加推樓盤，年內亦會推出紅灣半島咁話。
[email protected]