港交所噚日派成績表，靚係必然嘅，問題只係可唔可以做到超預期啫，結果冇令人失望，今年保唔保得住，就要睇我哋溫情總理同美國阿伯嘅調控經濟能力喇，呢啲係交易所不可控制嘅因素，但係要大家落力做嘢，最直接就梗係$$啦。
華華拎住份港交所業績，除咗睇佢賺幾多，跟手就搵佢哋行政總裁周文耀賺幾多，原來佢哋十巨頭舊年平均𢭃6039萬蚊，增咗15.5巴仙，而周總就加咗18.3巴仙，仲成為第一個年𢭃逾千萬嘅港交所高層。
舊年周生總收入達到1107.5萬，足足比06年增加咗171.3萬，佢今年5月1號新嘅兩年合約生效，唔知加咗幾多人工呢吓？
咁其他人呢，薪委會建議平均加4巴仙，其中2巴仙係生活指數調整，另2巴仙用嚟緊貼市場喎，董事局仲批准向僱員發放3.3個月花紅，雖然拍馬都跟唔上證券行，但都好過好多行業啦。
[email protected]