唔係搵藉口，近期啲波認真難賭，上期推介嘅緬恩斯都可以開個「B/A」反輸畀亞琛，搞到𠵱家德甲「紅盤王」有成4隊咁多，真係亂過乜。英超嗰邊又殺咗兩隊曼聯同米杜士堡上嚟，咁啱呢個禮拜兩隊喺足總盃對壘，咪當畀自己唞唞唔掂英超同德甲住囉。
睇勻今周最正常都係西甲「紅盤王」桑坦德，佢哋唔經唔覺已累積到68%嘅贏盤率，真真正正係各主要聯賽嘅「紅盤王」；周日桑坦德主場對住愛斯賓奴，睇嚟再追佢哋贏波，都應該都冇衰。
講真桑坦德班底肯定唔及愛斯賓奴，呢場外國標準盤開到2.25倍，折讓亞洲盤讓平/半高水，我畢傑實撐硬上盤。事關今季桑坦德喺亞洲盤每逢要讓波場次，都未試過令捧場客失望；6次讓波全部開出上盤，當中更有5場係讓對手平/半𠻹。
嘩！數據咁強，又係西甲「紅盤王」，唔怪得對西甲波滾瓜爛熟嘅華度同牽牛兄，都撐小弟推介桑坦德。加上愛斯賓奴又有主力魯費廸同摩西斯停賽，唔齊章之下更添上盤信心。
文：畢傑