下周日西甲護級戰，切爾達有主場之利，對住近況差兼護級大敵畢爾包，主隊如能贏波全取3分將對手放甩，真係好似拉中老虎機咁興奮，少讓必捧。今輪另一場西甲，主隊桑坦德半冷W，亦可敲。
華度
切爾達周中仲要踢多場歐協盃，對手更係「硬嘢」，嚟自德甲嘅雲達不來梅；不過切爾達主場出擊，之後對畢爾包又係主場作賽，最少免去舟車勞頓之苦。同雲達不來梅呢支攻力出晒名嘅勁旅「拍跳」1課，仲分分鐘收到寓賽於操之效，隨時攻守能力都大幅提升。
與不來梅「拍跳」係好事
睇番切爾達近況，歇冬後衰過一輪，1月份曾經錄得連輸4場肉酸走勢；幸好近期又見打番出水準，對雲達不來梅之前，5場比賽只輸過畀大勇嘅華倫西亞，其餘4場兩勝兩和。射手拜安奴亦搵番對射門鞋，新加盟嘅法國力量型前鋒巴莫高亦已「開齋」，整體狀態唔錯。
佢哋今輪迎戰對手畢爾包，最近走勢跌緊，近5場除咗主場聯賽贏基達菲2:0之外，其餘4場全輸。上周主場對住今季升班後無乜貨賣嘅塔拉戈納，喺塔軍有球員被逐情況下，打多1個仲要淨輸0:2，暫時仍然要排喺降班區嘅第18位，比排第17位嘅今日對手切爾達少1分。
所以，呢場亦可謂兩軍爭護級嘅「6分波」；切爾達有主場之利，梗唔放過放甩對手嘅大好機會。今季首循環秩序，畢爾包主場都唔夠切爾達砌，輸0:1；呢次作客，真係危過危樓。
愛斯賓奴頻撲難採「桑」
冷選方面，桑坦德主場對愛斯賓奴一仗，主隊贏波賠率有逾2.15倍，可以試下。兩軍近況相當，如果計最近10輪聯賽表現，桑坦德有5勝3和2負，愛斯賓奴亦有5勝2和3負，分列近10場聯賽表現榜第3及第4位，擺到明有得打。愛斯賓奴周中踢歐協盃要去到以色列比賽，一來一回都幾擇使；另文畢傑亦話桑坦德呢期當「紅」，一於捧場。
投資特攻隊金句
「呢場亦可謂兩軍爭護級嘅6分波；切爾達有主場之利，梗唔放過放甩對手嘅大好機會。」