自問一向嘴刁，尤其對日本菜要求甚高，所以朋友請客的話都會帶我去較高級的日本餐廳，避免我左彈右彈。不過當我到過千之瀧之後，發覺平嘢未必冇好嘢喎！店子雖小，但其鐵板壽司的確出色，上枱時要用餐巾擋住熱騰騰飛濺的醬汁，飯更㷫到變飯焦，食落脆卜卜，原來食壽司可以有另一番體會。
文︰蔡樂
攝影︰楊錦文
法式鐵板三文魚腩壽司$48
用挪威三文魚腩最肥美的部份，此部位1條魚只可做8件壽司，半生熟的狀態入口即溶，加上法國鵝肝及醬汁融和，滿口酥香。
小店用料不馬虎
千之瀧開業2個月，小店格局，店中只有2個師傅，入夜後坐滿人的場面，甚有日本街頭料理店的風味。望望菜單，除了一般菜式、壽司和拉麵供應之外，比較貴價的用料如藍鰭吞拿魚、A4及A5級牛肉都找得到。特色卷物亦有10多款，其中最引起我注意的是鐵板火瀧卷，很少有小舖會提供鐵板壽司，點了1客加其他壽司一試，被寵壞的舌頭一試就知新鮮，鐵板壽司熱辣辣出奇惹味；不過上枱時，和鐵板扒餐一樣汁醬飛濺，記得打開餐巾擋一擋。和老闆Teddy傾偈，店中的刺身和海鮮全部用日本飛機貨，2日便返貨1次，熱門的刺身如三文魚更日日有新貨，嚴謹程度不比高級日菜餐廳遜色。
創新西日Fusion菜
留意到餐牌還附有「廚師推介」Menu，是西餐菜式，個多星期更新一次，一向覺得坊間小店做Fusion菜不好食，但另一師傅明哥曾在著名西班牙餐廳ELCID當過廚，功力有一定保證，菜式如清湯煮澳洲和牛臉肉，以及加入了日本麵豉湯底的炸軟殼蟹雜菌天使麵，都能在西式和日式元素上取得平衡，色香味俱全。
鐵板火瀧卷$68
店中其中一個王牌，壽司包着炸蝦天婦羅，加上壽司底被鐵板燒成飯焦，入口香脆，而且暖暖的芝士有少許黐牙，食完仍然滿口香味。
白酒煮英國藍青口$58
英國藍青口雖然細細隻，不過蜆肉飽滿，聞落似牛油蒜茸炒蜆的味道，用西班牙白酒烹煮，酒味清幽，入口香醇。
清湯煮澳洲和牛臉肉$78
1客有3大件牛臉肉，約有200克，用雜菜清湯燜煮2小時，肉質煙韌得來軟腍，湯底和京葱亦很鮮甜。
千之瀧卷$80
鍾情蝦子的朋友必試！鋪得滿滿的蝦子非常脆口，皆因日日有新鮮的飛機貨，每客用8至10吋長的大蝦製成。
香芋軟殼蟹卷$68
以薄薄的芋片代替紫菜，口感獨特，包着來自越南的軟殼蟹，點睛之處是上面紅色的日本酸梅醬，入口酸甜開胃，食多幾件都不覺膩。
「呢度的刺身好新鮮，同好多高級日式料理一樣款式多，價錢亦合理。」
「鍾意半生熟的三文魚腩壽司，面層燒過好香，口感特別。」
「鍾意食海膽，無腥味又鮮甜，可以一個人食一板。」
睇路搵食
千之瀧（21457168）
地址︰沙田崗背街9-11號全輝中心B座地下17號舖
營業時間︰12nn-3pm、6pm-11pm
座位︰約30個
