「一到冬天我就有買帽癮，可能係以前喺多倫多讀書時開始上癮，一嚟嗰邊咁凍要保暖，最怕啲風吹入耳仔，我會起雞皮同周身唔自在；二嚟我嗰時試過染過一個紅色頭好Sharp，成日照鏡就會喺度諗戴乜色帽會更好睇，試過夜晚去街玩，戴頂金色BlingBling帽，個個都讚搶眼又好睇，自此每季入帽用邊隻色主打，就要睇吓我嗰期個頭乜嘢色喇。」
記者︰劉昱蘭
攝影︰楊錦文
白色冬季冷帽
「冬天主打當然係冷帽，夠暖最實際。我個頭返璞歸真變番黑色，所以呢期狂買白色帽，個Contrast最靚又百搭，趕時間襯唔切衫都唔會出事。西瓜帽係我最鍾意嘅帽款之一，我個頭都算大，佢有個硬硬哋嘅鴨舌位遮緊少少個頭，望落即刻細咗。右邊頂帽都唔花巧，簡單自然。畫家帽要着得真係有型戴佢先好睇，好似刻意咗啲我唔鍾意。」
Gucci限量版金色腰帶
「近期大Brand飾物就買咗條Gucci，今季興金銀色，但FullGear上陣就太誇，有條Belt含蓄啲閃閃吓都夠殺，G字Pattern簡單大方。結果搞到妹仔大過主人婆，呢個月我買咗4、5條黑色裙去襯佢。」
珠仔耳環
「見親圓碌碌的耳環就會睇多幾眼，因為佢個Shape同我個人一樣。以前狂買一點圓形的耳環，𠵱家頭髮長咗會冚住，所以轉買吊落嚟嘅款式。呢款咁多粒珠仔，中晒我死穴！」
