我係周卓妤，今年3歲，最近我好乖，媽咪同爹哋特登放假同我去旅行，佢哋話有個叫布吉島的地方，裏面有個會所有新的兒童天地、新游泳池、新的活動室……好多嘢玩。我仲聽到媽咪同爹哋講：「嗰度個PetitClub有人照顧囡囡，我哋可以自己去游水都唔使擔心。」佢哋自己去游水？即係我可以自己去玩？咁我去呀！
記者、攝影：廖秀娟
鳴謝：ClubMed
平日去游水，爹哋媽咪好緊張㗎，特別係媽咪，成日叫我唔好游去呢度，唔好游去嗰度！但係PetitClub啲姐姐就唔會，玩得仲癲過我。
第一日去到係下晝，好眼瞓，媽咪放低我喺PetitClub瞓覺，裏面已經有幾個小朋友瞓到噶噶聲，唔會好驚，我就俾媽咪同爹哋去游水，我自己瞓覺。
瞓醒之後，有個姐姐嚟陪我，佢用粉紅色橡筋幫我紮辮仔，又話我乖，好好人；之後佢話媽咪放低咗泳衣，問我想唔想游水，唔……我一個人可唔可以去游水㗎？姐姐帶我去泳池睇吓，原來好淺水㗎咋！只係到我膝頭哥；好多小朋友喺度玩緊，個個都有玩具㗎，波波、船仔……仲有幾個姐姐一齊玩㖭！我梗係要玩埋一份啦！
姐姐見人就掟
其中日本姐姐最頑皮，佢用入咗水的氣球做水彈，邊個行過佢就掟邊個，邊個小朋友怕醜唔敢玩，佢又掟佢，個個都唔放過。我哋玩得一陣就學識好似佢咁掟水彈，有時一齊圍攻姐姐，有時姐姐又會同我一齊對付敵人，周身濕晒，追嚟追去，真係好好玩呀！
姐姐話我仲可以去活動室畫畫、玩玩具；我哋每日仲有戶外活動，姐姐有時帶我哋去池塘睇魚、睇青蛙，有時去沙灘堆沙，下晝有茶點時間，夜晚又會同我哋講故事、唱歌仔；我喺度識咗好多朋友，平日得我一個人好悶，呢度就日日都好多人陪我，從來未試過咁開心㗎！
同媽咪一齊比賽
玩到媽咪有時嚟叫我去食飯我都唔想去，不過，餐廳的自助餐真係好好食，日日都有好多唔同的好食豬扒、牛扒或者漢堡包，又有好多蛋糕、雪糕、朱古力，樣樣我都鍾意，唔使媽咪迫我都肯食；爹哋媽咪日日都讚話啲嘢好食好新鮮，我哋餐餐都飽到唔郁得咁滯。
媽咪見我咁開心，問我第日仲嚟唔嚟，佢話我大個啲，呢度又有好多啱大朋友玩嘅活動，但我有PetitClub就夠啦！媽咪話去睇吓先講啦，嘩！原來大哥哥姐姐可以玩空中飛人、跳彈床，又可以去浮潛、潛水，我見佢哋喺泳池同媽咪一齊參加獨木舟比賽，我都好想第日可以同媽咪一齊參賽呀！
出門handbook
簽證：持有效特區護照或BNO均免簽證。查詢：25216481（泰國領事館）
貨幣：1港元約兌4.5泰銖
時差：慢香港1小時
長途電話國家區號：66
旅遊查詢：hk.travel.yahoo.com/city/phuk/spot.html
ClubMed假期：
布吉島5日4夜，包括機票、機場接送、住宿、每日3餐、全日無限量飲品與小食，及各項活動，成人每位HK$6,570起，3月優惠，每4晚送1晚；3月至4月優惠，成人每位HK$7,660起，每2位成人可帶同一位2至11歲小童免費入住，小童只需付機票HK$2,500至HK$4,400。（兩款優惠不能共用。）查詢：31119388/www.clubmed.com.hk
去泰國，買個泰皇郵票啦，最有泰國風味㗎！
今日布吉島
氣溫23-33℃
濕度92％
11-3月：全年最適宜旅遊的時間，約24至32℃，少雨，較亁燥，陽光海風最優美。
3-5月：非常炎熱，約27至36℃，但尚算少雨、亁燥，旅行也算適宜。
5-10月：海嘯後雨季變得更長，氣溫約27至38℃，又熱又多雨。
