估唔到渣打咁鍾意「Peter」呢個名，走咗Peter王冬勝之後，今年又搵個Peter返嚟，今次呢個Peter仲勁，識得飛嘅，之咪係夢幻島孩子王PeterPan小飛俠囉！話說小飛俠舞台劇今個暑假會喺香港公演，渣打就搶咗個白金信用卡優先訂票，攞Peter省招牌。
為隆重其事，渣打個人銀行業務、信用卡及私人貸款業務總監盧慧敏，都抽空出席記者會。佢就冇話自己係咪小飛俠fans，只係話香港人簽卡簽多咗，所以佢哋今年嘅目標都會訂得進取啲，希望喺今年內，新增信用卡數目可以達10萬張咁話。
講番呢個舞台劇，雖然之前兩年都一路喺新加坡同菲律賓等地做巡迴公演，但原來呢套舞台劇嘅首演係喺香港做嘅，時為05年，所以今次都可以叫做載譽歸來。順帶一提，舞台劇會將部份收益捐畀指定慈善團體，算係延續小說原創作者J.M.Barrie嘅精神。
[email protected]