花旗國最犀利核動力航母列根號訪港，八方有機會上船，睇見大批美國大兵排隊等上岸吃喝玩樂，好興奮咁款。艦長話艦上有5,000個官兵，估計喺香港總共會使幾千萬港紙。
不過列根號都好識做生意，喺船艙擺檔賣紀念品，220蚊件T恤、130蚊頂鴨嘴帽、40蚊個紀念布章等，唔少行家大手掃貨，有電視台記者一手掃十幾頂鴨嘴帽，有人帶唔夠錢就問行家借錢找數。行家同八方講，由於呢啲列根號紀念品岸上罕有，深受軍事發燒友歡迎，喺網上炒賣有價有市，入定貨無蝕底㗎。
列根號上唯一華裔女兵劉寶華係北京人，嫁去美國後參軍，負責後勤工作，今次訪港會shopping，佢媽媽亦會嚟香港團聚。