住咗佛羅倫斯一星期，都係黐朋友屋企瞓，皆因酒店房實在太貴喇，寧願留番啲錢用嚟坐火車四圍去。某日落街行去坐巴士時，見到一部大車泊咗喺畫有藍色線嘅車位度，我都講過佛羅倫斯啲車普遍細架啲，突然見到部咁大嘅車，嗱嗱聲望多兩眼！
點解我咁大驚小怪？問題係當地車位分白、藍同黃線，我只知白線係全日任泊，而藍線係特定位，即好似香港嘅專用位，齋黃線我無見過，但就見過黃線內印有「傷殘人士專用」嘅標記。
原來呢架係RenaultTrafic客貨車，以前西班牙曾搵佢做救護車，香港都有引入過，可惜唔係好賣得。當我影佢相時，車主咁啱走出嚟，打開個尾箱攞嘢，點知畀我昅到成個尾箱都係礦泉水，雖然早知當地人唔興煲水飲，但見佢塞滿晒成個車尾，唔知仲以為佢送貨㖭！
文、攝：TigerL