有時啲嘢都係為啖氣啫！八方唔係講緊啲乜激氣嘢，而係形容緊可口可樂就快喺香港推出嗰隻Coca-ColaZero啫。呢隻「零」樂，賣點唔止係零糖、零卡路里，味道仲同紅罐嘅原味可口可樂極似，冇DietCoke咁淡，而飲落去嗰啖氣，更加係不經刪減，同原味可口可樂一樣咁強勁！
香港限量版叫價$420
探子回報下星期一喺街有得賣，八方試飲過，發現味道的確貼近紅罐可樂噃，專誠問吓可口可樂新代言人鄭中基啦，佢猛話好正，又話自己以後會餐餐飲都唔怕肥。不過佢係代言人梗係咁講啦，但互聯網上所見，網民界真係好多人都話：「好鬼死想飲！」有水貨可樂店老闆仲話，好多可樂fans一知道香港有零樂，已經預訂咗幾百箱㖭。
其實零樂咁搶手，同佢型到爆嘅黑罐包裝好有關，食正潮界嗰股「黑旋風」，聽聞喺英國推出之後，好多型男都爭住飲，佢個barcode仲整到成個可樂樽形咁，唔似平時啲四四方方。Cokezero特別有香港限量版，已經秘密流出雅虎拍賣網，截至噚晚已叫價到420蚊一罐，設計特別型到暈。
𠵱家啲人注重健康，可口可樂同百事爭生意，自然要出健康飲品，之前啲減肥可樂又未hit得起，兩邊巨頭梗係不斷推新嘢，百事嚟緊都會出一款講究營養嘅礦物飲品Tava百事，但乜味就未知喇。
