一塊潔白嘅衞生巾，象徵婦女團體希望曾蔭權、梁家傑呢兩位特首候選人體貼、保護女性嘅心聲，平等機會婦女聯席寫咗個「衞生巾政綱」交畀兩位大男人參考。自言逢請必到嘅袋巾，橫掂不嬲都有用袋巾嘅習慣，袋多一條巾都冇所謂，噚日佢笑笑口親自接收咗包粉紅色M巾，順手袋落西裝褸袋。
袋巾接咗M巾，煲呔就無咁客氣，20個女示威者操上禮賓府，想擺低份衞生巾政綱畀煲呔，點知警方出動30幾個差佬圍住一班女流之輩，阿Sir話M巾令人尷尬，唔畀拎入禮賓府，雙方爭持一輪，弱質女流頂唔順，惟有將塊M巾黐喺示威區鐵馬算數。M巾令人尷尬？八方就唔信禮賓府入面無人用M巾！