陳伯：Hi，成議員，好彩我仲見到你，行快兩步就差啲以後都見我唔到啦！
成議員：無乜嘢嘛陳伯，我見你行得走得，後生仔都無你咁快啦，行得快又點會出事啊？
陳伯：我係就係健步如飛，但如果笪地凹凹凸凸，就識武功嘅大俠都會跣親啦，我仲要一把年紀，跌咗喺地唔搞出人命就奇啦！
成議員：咁陳伯你去邊度咁驚險啊？以後咪去啲危險地方咪得囉！
陳伯：你以為我去伊拉克打仗咩？我只不過去個仔間公屋探吓個孫之嘛，點知去到將軍澳彩明苑幢公屋個大堂，一出𨋢就差啲跣親，成個大堂地下嘅磚爆起晒，真係行過想唔跌喺地都要識輕功！
成議員：嘩，𠵱家仲邊有咁差嘅樓㗎？起幢公屋成億億聲，點解會連個大堂都會爛磚㗎？房屋署唔係會整番好㗎咩？
陳伯：你講房屋署，我就火起啦！呢個房屋署署長陳鎮源都唔知做乜嘢，使公家錢請成班官，淨係識收人工同坐喺冷氣室。好似呢單大堂爆磚，佢哋理都唔理，公屋居民點都係佢租客嘛，我收租嘅樓有咩損爛，收得人哋租，做業主就第一時間做嘢啦，成個房屋署就係識官威，理得你哋街坊跣死！
成議員：呢啲樓都唔係起咗好多年，點解會爆成咁㗎？係咪起樓嘅時候出咗問題呢？
陳伯：成議員你唔知係咪開會聽得多房屋署啲官講嘢，都學識幾招推莊。房屋署咪一有咩事，就推晒畀人，唔係話承建商出錯，就係外判商有問題，再唔係就連工人做得唔好都賴埋，總之結論就只得一個，就係房屋署乜嘢責任都無！
成議員：咁𠵱家個大堂點搞法啊？你個仔日日都要出出入入㗎喎！
陳伯：咪就係拖字訣囉！搵幾個高官嚟度一大輪，竟然話係街坊出入大堂「使用不當」搞到爆磚，大佬啊，街坊最多咪行過隻腳大力少少，𠵱家唔係一塊磚爆喎，多極人行都唔會搞到咁多層樓地下都爆磚啦，擺明係起樓監管有問題。房屋署呢個發展商兼業主都係無良㗎啦，街坊自己攞膠水去整番啲磚就仲實際！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]