巴西盛產「插花王」，周二晚歐聯16強次回合，羅馬嘅森巴中場文仙尼連環插花更勝丹尼遜，姿勢實際兼備，連插6下之後勁射破網，助球隊奠定2:0勝局；「王子」托廸賽後更瞇起雙眼，露出招牌微笑話：「球迷，決賽見！」
里昂同羅馬嘅16強賽事，可能係香港球迷最忽略嘅比賽，但戰情可觀非常，里昂臨場亦如所料般輕微起票；「讓球主客和」讓一球由3.3倍熱至3.2倍，可惜遇上表現幾乎完美嘅羅馬，始終束手無策。「王子」更喺22分鐘頭槌先開紀錄，而文仙尼就喺完半場前，以令人頭暈嘅6次插花，扭到史基拿斯「自動彈開」，勁射掛網波奠定勝果！
文仙尼自言最高紀錄係連插8次，今次插得6次已經算少，但佢起碼好過啲淨係識喺中場猛「插」又唔到肉嗰啲同胞啦！而「王子」今仗入咗一粒係得戚啲，佢仲向球迷承諾：「我哋決賽見！下一圈，我想同AC過招！」
所謂同胞都冇面畀，里昂今仗16次射門都入唔到一球，好大程度係羅馬嘅巴西門將杜尼表現出色有關，佢連祖連奴比南布肯奴嘅致命罰球都救到，確係抵讚！