肥姐沈殿霞去年12月離港去溫哥華探95歲嘅母親，噚日有周刊寫話肥姐休養咗兩個幾月之後，病情未有好轉，所以今次返嚟香港，係為咗去瑪麗醫院醫病。噚晚7點左右，主角肥姐真係返到香港，佢依然坐住輪椅，由個女欣宜陪同下返嚟。
珠光寶氣
肥姐雖然搭完長途機，但係可能一早預咗有記者喺度等，所以明顯經過悉心打扮，化晒妝之餘，仲右手戴住隻鑽石表，左手就戴咗隻大鑽石戒指，全程咬晒香口膠。不過着住對平底鞋嘅肥姐，對腳明顯仲有啲水腫，面對記者問及佢嘅病情就一概冇回應，不過就冇黑面，仲笑容滿面㖭！
欣宜喺隔籬就幫媽咪解圍話：「你睇我媽咪今日幾靚？佢啱啱搭長途機，關於病情遲啲再講。」當問到欣宜肥姐今次返港有乜嘢行程，欣宜就話：「我遲吓會去上海做騷，媽咪都想過去支持，但我唔想媽咪咁操勞，有叫佢唔好去。」再問佢𠵱家落機會去醫院定返屋企，欣宜即刻話：「乜你哋問埋啲咁嘅問題㗎，梗係返屋企啦。」不過當問到欣宜有冇擔心肥姐嘅病情時，佢又好自然咁話「擔心」。
超速返家
之後佢哋喺富豪機場附近上車，個司機仲擔咗張櫈仔方便肥姐，然後肥姐架車就一支箭咁駛返九龍塘住所，其間仲有超速㖭。
另外肥姐好友劉鳳屏噚日接受商台訪問，佢下月28日喺紅館舉行一場個唱，佢話返到嚟香港第一件事就係打畀肥姐，肥姐就話畀佢聽肚屙，劉鳳屏仲話以前好多演出機會都係肥姐畀佢㖭。