呔巾口水戰次回，煲呔陣營大反攻，首先係洗洗個太平地，立例禁止班吮委現場唔生性亂鼓掌！
上次就係袋巾受掌聲煽動，即時撻着，迅速陷入亢奮狀態，以致越來越得戚！咁呔巾越囂張，台下啲掌聲就越勁，咁又輪到呔巾更加嘴藐兼奸笑咯喎，咁就即時造成惡性循環，而忠直老實嘅煲呔，就此俾小人得咗志，蝕咗頭注嘞！
今次立例，唔准鼓掌，之不過，應該係單方面禁止袋巾分子鼓掌，而唔係禁埋愛國愛港嘅箍煲陣營！道理好簡單，正如兩大猛男相對格劍──唔好誤會，係真正格劍嗰隻──其中一個，劍術高啲，另外嗰個想贏佢，唔係兩個都一齊唔用劍，而係只跟對方繳械，自己就繼續揸劍！
咁係咪唔公道？好笑喎，呢場吮舉，由頭開始，又有邊一忽係公道呢？袋巾就算吮贏，阿公一拍枱，話堅決唔委任，再攞把槍出嚟，唔通袋巾就真係可以沐猴而冠？
齊齊禁拍手，搞到個場鬼咁Dry，唔見得煲呔着數！有啲掌聲「浪」一「浪」，都叫做有少少潤滑劑，調節吓，令到呔巾格劍嘅過程之中，降低磨擦所產生嘅出血現象，安全健康好多，兼拍手嗰陣，大家都可以BuyTime，有十零秒鐘諗吓點樣覆佢啅，冇咗掌聲呢隻「花士令」，袋巾短兵相接，呢隻咁粗獷嘅交鋒，唔出事就奇！
加埋上次袋巾得戚，唔止袋巾分子拍手咁少，袋巾對住鏡頭賣笑，亦係令市民加分嘅茅招！明知煲呔個相，面部筋肉天生扯得好行，生得夠威嚴，袋巾儍笑搶位，即係打茅波！
要禁就禁埋候吮人儍笑！唔准笑！嚴肅啲！講緊治港大事，笑代表輕佻，代表對國家同鴉片戰爭以來嘅民族先烈唔尊重，袋巾背對住主持，上一趟，就應該喺對面裝副大鏡，范太一見到袋巾笑，就應該行埋去摑佢一巴──啪！人心大快，笑乜春？笑吖嗱！