利森喺1992年至95年期間隱瞞虧損，將扎根200幾年嘅英國霸菱銀行，一朝拖垮，最後佢亦做咗階下囚，綽號亦由「神奇小子」變為「魔童」。他在99年出獄後，除咗靠把口齋talk搵食，仲做埋足球隊董事，同第二任老婆過住平靜生活。
不過，江山易改本性難移，有時心癮起，佢都會用自己錢炒吓外幣過吓癮。家吓已40歲嘅利森，最近又話有意全身投入金融市場，靠炒賣為生，但重點係，佢只會為自己而戰，唔再幫人投資嘞！
投資者爭住搵佢
當年利森因押重注日本股票期貨觸礁及隱瞞虧損，令霸菱蒙受14億美元損失而倒閉，佢被判刑6年半。不過，佢喺新加坡坐咗3年半後，就因患大腸癌獲釋，佢喺獄中將經歷寫成嘅《RogueTrader》，其後搬上大銀幕，拍成電影《股壇狙擊手》，由伊雲麥葵格（EwanMcGregor）扮利森。
利森出獄後，有唔少機構搵佢演講，每次收費高達5000英鎊（約7.5萬港元），收入認真唔錯。除咗演講，佢喺05年仲做咗愛爾蘭足球隊GalwayUnited嘅商務董事㖭！
唔講唔知，咪以為利森當年嘅所作所為會嚇窒投資者，佢話𠵱家都仲有唔少人搵佢代為投資，之不過經一事長一智，佢話輸晒自己啲錢就冇所謂，但如果受人所託，就有責任幫人賺錢，諗落都係制唔過。所以，過去四五個月，利森都淨係攞自己嘅退休基金嚟炒美元，亦甚少沾手股票或商品市場。不過佢話，如果第日唔撈份工，就索性全天候對住部電腦做人，專職炒賣喎！
[email protected]