咁多商會之中，工總同傳媒關係最密切，每季至少同傳媒見面一次，就工業界最關注嘅議題發表意見；噚日佢哋又宴請傳媒，對最近熱門嘅大陸中外所得稅合併，交流一吓意見。
工總主席丁午壽話，當中較值得港商留意嘅，係提及居民企業同非居民企業呢個新概念。若港商將企業主要控制營運管理設喺國內，將被視為居民企業，企業嘅全球收入都要徵稅，若然港商有海外業務，呢項新稅對佢哋嚟講都幾「揦脷」，分分鐘抵銷唔到國內低成本嘅運作；所以丁主席提醒港商，最好將企業嘅控制營運留番喺香港，做個非居民企業着數啲。
另外，佢哋又關注兩稅合一嘅過渡期安排，不過根據稅務專家嘅講法，想趕尾班車成立新外資公司，享受過渡期優惠嘅港商應該嚟唔切，因為，本月中人大通過法案前成立嘅公司，先可以享受到過渡期優惠。
[email protected]