如果你對食好有要求，以下介紹的就絕對合你口胃。如果你對食沒甚要求，以下的介紹就更加要睇。位於銅鑼灣的日本餐廳「一門」成日大排長龍，就算訂好位都要等。今個禮拜終於在九龍開姊妹店「一遊」，地點就腳之餘，Menu中的50款串燒一定要試勻晒呀！其中用雞皮包住蝦來燒，都係第一次試咋！
記者：梁學文
攝影：陳陶鈞
Model：Becky
簡單食材做菜顯功夫
唔係HardSell，今次介紹新開的一遊，菜式水準有番咁上下，尤其是串燒類，更加增至近50款。對食有要求係老闆玉置良三先生做餐廳的宗旨：「我好想將日本正宗嘅口味帶畀香港人，仲要講質素。我都知道鮑魚好味道，不過就真係太貴。其實唔使用好貴嘅食材，一樣可以做到好菜式，就算簡單如玉子（雞蛋），只要用心做，一樣可以做得好出色。」所以呢度會細心挑選食材，再加上日本師傅的功夫，務求在發揮到食材本身的質素。呢度的串燒就是最佳的示範，一來選料夠新鮮；二來唔用炭爐燒，食完唔會成嘴都係炭屎，好味又健康。
燒雞皮蝦$45
雞皮蝦每日限量供應，要食就要早點柯打。用雞皮包住大蝦燒，大蝦吸收到雞皮的香味，連殼一口咬落去，油脂滿瀉。
豚肉茄子串$18
薄薄的豚肉包住茄子燒，入口有豬肉的香味，茄子亦吸收了豬肉的鮮味。
雞尾串$20
燒雞尾入口夠香無羶味，算係特別的驚喜。
秋刀魚鮮蘆笋$100
秋刀魚味道鮮甜，加上鮮蘆笋的清甜味，甜上加甜。
燒活鱔$48
燒活鱔味道鮮滑，每日限賣10零串，手快有手慢無。
免治雞肉釀青椒$25
感覺像煎釀三寶日本版，食的時候蘸上少少豉油，味道更好。
鵪鶉蛋串$18
鵪鶉蛋外面燒到香脆，入面則是軟腍腍的，香軟交雜。
豚肉青椒仔串$18
青椒燒完味夠重，再加上豚肉的甘香味，味道成雙。
厚燒玉子$46
厚燒玉子是呢度的招牌菜，來到不可不試。蛋漿的比例調校得恰到好處，令雞蛋煎好之後依然好Juicy。師傅逐層逐層煎，玉子入口幼滑又香口。
肉鬆豆腐煮（溫泉玉子）$58
用麵豉湯做湯底，加入溫泉玉子、豆腐同肉鬆一齊煮，玉子蛋黃不會一撈就散，蛋白好滑，跟豆腐互相配合，入口滑嘟嘟。
東洋卷$46
老闆自創的東洋卷，用牛油果、飛魚子同鰻魚做餡。飛魚子夠爽口、鰻魚夠滑、牛油果夠香，香爽滑一次過在口中爆發。
鹽燒三文魚茶漬$55
三文魚燒過之後經已好香，再加上茶漬（熱湯），香上加香。食的時候加入葱和熱湯，熱湯一撞埋香葱，即聞到清香。
江戶町屋設計
店內裝修採用日本江戶時代的町屋設計，町其實是日本街道的名稱，町屋就是指街上的屋。未踏進店內，在門外走走，感覺儼如返回江戶時期的京都，木門、燈籠、大酒桶，營造一股懷舊感覺。一入門更見驚喜，店內竟然有個小花園，好似走進一個日本家庭，好有屋企的感覺。記得上次去京都旅行，曾經到訪過一個家庭，感覺跟這裏一樣，一遊猶如帶我到了京都一趟。在如此舒適的環境下，未食經已滿足了一半。原來店名一遊，就是解作到此一遊。
睇路搵食
一遊（23662999）
地址：尖沙嘴諾士佛臺1號其利中心4樓
營業時間：6pm-12mn 座位：93個