教資會派大學研究成績表，審核九九年到○五年間三千五百名學者發表嘅一萬九千項研究成果，分成十三個研究組別，睇睇是否達到國際級水準（達標）。何謂達標呢？以研究結果是否有在國際著名學術刊物發表以及被其他學者引用嘅次數等等計算。用呢個方法，某大學如果有三四個專家學者（舉例啫）發表三四篇論文，篇篇在一流期刊刊登，達標比例就會有100%，相反如果某大學有六七十個學者，人人發表論文，想話有100%達標，當然難得多。故此港大與中大有醫學院、浸大冇，但在醫學及衞生科學組別中，浸大研究第一，達100%，壓倒港大（94.4%）與中大（90.23%），就係咁嘅原因。
教資會隔幾年就發表一次RAE（ResearchAssessmentExercise）報告，好受學界重視，排名低嘅話，唔止影響聲譽，仲可能影響埋研究經費，直接打擊荷包。今次排名，科大整體第一（87.12%），中大第二（86.95%），兩者相差0.17個百分點，中大可說輸條頸；港大第三（85.47%），距離就遠少少，估唔到嶺大會排到第四（76.35%）咁醒，至於教育學院，專以教學為主，排第八（30.49%）輸幾十個馬位，不足為奇。
十三個組別之中，中大有五個第一（電腦/資訊科技、工程學、法律、商科及經濟學、人文學），科大有四個第一（生物學、電機/電子、建造環境、社會科學），港大有兩個第一（創意藝術、教育），城大有一個第一（自然科學），浸大有一個第一（醫學及衞生科學）。據教資會研究特別小組召集人錢大康教授（科大副校長）話，院校之達標比率若相差一至兩個百分點，實際上差距不大。用呢個標準計，重新排列過每個組別嘅第一名，生物學有兩個第一（科大、城大），醫學（浸大），自然科學（城大），電機/電子（科大），電腦IT（中大），工程（中大），建造環境（科大），法律（中大），商科經濟（中大），社會科學（科大、中大），人文（中大、港大），創意藝術（港大），教育（港大）。咁計法，三間研究大學難分邊個第一，以中大領先些少。