要飽覽佛羅倫斯全景，當然要上山頂；落咗巴士就見到一個大型泊車場，泊車地方咁大，梗係預咗畀旅遊巴啦！個個遊客都企晒喺泊車場旁嘅山邊望住成個佛羅倫斯，真係有種「大地在我腳下」嘅感覺！除咗風景，山上其實無咩嘢睇，但無理由就咁落山啩？一上一落都要個幾鐘頭，惟有行入啲睇嘢。行到咁上下就見到一座教堂，教堂旁是一大個墓園，再行入啲呢？就係住宅區。山上住宅區同山下的，真係天淵之別，靜到連螞蟻行過都聽到，幾誇張㗎！
周街見到古董車
當我係咁意遊完山頂，諗住行去搭巴士時，就發現一架「孤獨精」停喺路邊！我專登幫佢改呢個花名，原因係喺我行入去時，都唔覺佢嘅存在，到我行番出嚟差啲撞到佢先發現呢㗎「孤獨精」！車身顏色真係好五、六十年代，見到雙門設計，估佢應該又係Fiat，但個款好似Mini，咩型號？完全搵唔到資料。其實都唔知話歐洲人節儉好，定話佢哋念舊好，周街都搵到超級舊車，若然放晒喺香港，一定變成古董車迷收藏品。
文、攝：TigerL