升岡國際主席劉錫康噚日同傳媒春茗，除咗講吓升岡嘅發展大計，例必提及劉生嘅至愛──已退役嘅馬王靚蝦王。
話說00年，靚蝦王出征日本安田紀念賽為港爭光，成為第一隻喺外地贏到冠軍嘅香港馬，而原來嗰次賽馬背後仲有古仔㗎。
話說靚蝦王坐親飛機都好驚，唔單止食唔安坐唔樂，仲冇晒胃口，就算有馬伕全程陪住，坐程飛機已經蒸發咗50至100磅，相當於十分一體重，到步後起碼休養三、四日先可以復元。
為咗靚蝦王出征順利，劉生特登喺澳洲請咗個識馬語嘅人陪伴出征日本5日，負責安撫靚蝦王嘅情緒，短短5日就燒咗成萬銀港紙，但係呢筆錢就用得非常抵，因為佢不知𠱁得靚蝦王幾咁開心，體重竟然冇乜點跌，最後贏埋頭馬，威到盡。
不過，劉生就因為唔肯定究竟嗰個人有冇料到，到咗01年出征杜拜，冇請佢陪靚蝦王，點知就輸咗個馬鼻，只係得第二，一度令劉生好唔開心，仲怒炒騎師霍達。
雖然靚蝦王03年已經退役，但總共攞到12冠10亞嘅驕人成績，為劉錫康贏到近3800萬獎金同贏埋面子，難怪劉生到𠵱家都仲不斷提住靚蝦王啦。
[email protected]