喺97回歸前掌管土地基金嘅鍾瑞明，回歸後轉工頻頻，舊年9月先至加盟亨達國際，出任執行董事、董事總經理兼副主席三職，華華仲記得，舊年亨達老闆鄧予立仲大鑼大鼓，喺港格宴請300人開酒會，中港台猛人就算人唔到都禮到，歡迎鍾總裁加盟。估唔到半年都未夠，亨達噚日就出張通告，話鍾總裁因為私人理由辭去亨達三職，由6月1日起正式生效；計落即係三個月通知。
相信大家對鍾總裁最有印象，除咗97前身為特區土地基金行政總裁，專責幫阿爺睇實土地基金，就係近年做過房協主席，其間又過中銀同怡富。喺加入亨達前，做過中富控股及世茂國際，但都係做唔長，例如世茂只做咗一年。
不過，鍾總裁依然有唔少公職，例如接替劈炮唔撈嘅胡應湘做城大校董會主席，又係房委會財委會主席等，近排仲跟住財經事務及庫務局長馬時亨走去中東出巡。唔知下次有鍾總裁消息時，會唔會係自起爐灶呢？
[email protected]