大學教育資助委員會主席林李翹如女士即將任期屆滿，三月三十一號就夠鐘，但係佢嘅繼任人係邊個呢？政府仲未宣佈，令人奇怪，近年政府委任一啲重要公職，往往拖到好後好後先至宣佈，唔通香港冇人才，或者人才唔肯替政府効力？教資會負責撥款畀大學，監察大學教研水平，做主席嘅，要鎮得住至得。林太之前係鄭維健，鄭之前係梁錦松，梁之前係李國能（希望左丁山冇記錯），位位都係大人物，呢個位唔係是但搵位政府鍾意嘅人就可以擔當嘅。
雖然林太繼任人未公佈，但教育界盛傳查太史美倫會接班，或者等特首選舉後先至宣佈，教育統籌委員會主席王䓪鳴亦應該夠時間咯，由邊位替佢呢？相信李局長心中已有人選，但咁蹺又碰上教育學院事件，有排煩，曾特首競選要緊，萬事都要四月或甚至七月後先至再安排啦。
查太有冇教育經驗，唔緊要，以前教資會主席上任之時，都唔見得對大學教育有幾深厚認識，或者林太除外啦，因為佢曾長期擔任中大校董及司庫吖嗎。嗰陣林太係恒生銀行高層，而中大司庫多數與恒生有關係嘅，現任司庫陸觀豪就係前恒生副行政總裁。
做教資會主席最緊要做事公正，既可與教統局局長合作，又可與八間大學校董會主席、校長有偈傾，能夠服眾。查太係行政會議成員，甚有威勢，只不過唔知道佢有冇林太咁多時間專心做好呢份義工啫。
過往經濟不景時期，大學撥款減少，有人怪責教資會，其實決定每一個三年度撥款幾多嘅，係教統局與財政司傾掂數先，決定咗幾多錢就通知教資會，然後由教資會分配；錢少咗，教資會當然要每間大學攞少啲，於是就容易成為大學嘅出氣袋。政府既然決定撥款幾多，點解唔直接由教統局分配埋呢？皆因港英時代，政府為避免干涉大學學術自由，故此成立教資會，委員係海外著名教授與本地大學教授，由教授專家分配撥款，總好過由教育官僚包辦也！