打仔男星老婆「DD」，因為係模特兒出身兼性格洋化又open，所以喺香港名人圈幾受歡迎。喺外國長大嘅佢今年第一次返香港過農曆新年，當然唔識啲繁文縟節，佢喺外國嘅老竇阿媽都怕佢唔識，專登幫佢準備埋利是封，山長水遠咁喺美國寄嚟香港畀佢用，但係可能冇教佢點入利是。話說「DD」早輪同公關、朋友食飯，好開心咁派利是，但人人拎完都好奇怪，因為封封都好厚，莫非佢派幾千蚊？事後打開利是封，其實人人都係$200，不過有啲就係20張$10、有啲係10張$20，仲有人係1張$100、1張$50、5張$10，認真搞笑！
撰文：阿蘇
本欄逢周一至六刊出