AC1月買朗拿度，好多人都大力反對，原因係朗拿度場內外都過晒氣！估唔到個幾月過後，竟然變咗隻又肥又可愛嘅招財貓！
據講自朗拿度1月底着上紅黑球衣後，AC2月份球衣銷量比平時高30%，官網嘅每日瀏覽量亦激升至400萬，你話驚唔驚人？唔止咁，朗拿度首場為AC上陣件波衫，網上以17,500歐元（約17萬9千港元）賣出。今個月19號，朗拿度仲會去法國馬賽參加第4屆反貧窮籌款賽，而到時佢同前法國球星施丹，仲會分別作為兩隊隊長，所以邊個話朗拿度out呀？
上陣與否入場關鍵？
周三對些路廸場歐聯比賽，聽講雖然可以坐8萬幾人嘅聖西路，可以恢復舉辦番比賽，但入場球迷數字估計得2萬幾人；票房咁差，唔知係咪同朗拿度冇得出場有關呢？點都好喇！香港球迷都熱切期待周日場米蘭打吡，我求大俠宣布個好消息，就係場波原定香港時間深夜3點半踢，𠵱家意甲賽會決定提早至晚上10點正開波。唔使捱夜喎，球迷仲唔call定老友記禮拜日一齊睇好波？