由細到大都聽見阿媽成日講：「出街食飯，食埋啲味精落肚，冇益呀！」係咪冇益就唔知，但可以肯定出街食嘅，幾好味都好，總是缺少了一份阿媽的味道、一份住家嘅溫暖感；今日我哋就訪問咗18位紅人明星，講吓佢哋至愛嘅家常菜，突然之間都好掛住阿媽煮嘅菜，記得今晚早啲返屋企食飯喇！
記者：趙珮倩、林佩婷、梁學文、朱崇德
攝影：林栢鈞、何家亮、楊錦文、譚盈傑、陳偉強、陳盛臣
★朱凱婷
我好鍾意食雞翼，有一次同婆婆行街市，諗到將雞翼起骨，釀入顏色豐富嘅材料，我鍾意食西芹，媽咪鍾意食金菇，加埋甘笋撞色，啖啖肉，我閒閒哋一次至少食6隻㗎！
三色釀雞翼（d）
價錢：$40/6人
需時：15分鐘（不計醃雞翼時間）
材料：雞中翼12隻、甘笋1條、西芹1束、金菇1包、砂糖/麻油/橄欖油各1茶匙、豆粉2湯匙、豉油1湯匙、胡椒粉少許
做法：先將雞翼剪去頭尾軟骨，慢慢起骨，然後以砂糖/麻油/橄欖油/豆粉/豉油/胡椒粉醃3至4小時備用；甘笋/西芹烚腍切條狀；金菇洗淨切短身。將西芹/金菇/甘笋釀入醃好的雞翼，下鑊以慢火煎熟至金黃即可。
黃德斌：
細個阿媽就教我煮呢味餸，仲帶埋我去街市話我知點揀新鮮魚。雖然好普通，但撈飯食一流，閒閒哋我都可以食到兩、三碗飯！
梅菜蒸鯇魚（a）
價錢：$16/3人
需時：20分鐘
材料：鯇魚腩12両、甜梅菜1束、葱/鹽/薑粒/麻油/胡椒各適量、蒜頭一粒（切碎）、糖/生抽/老抽/花雕酒/生粉各1茶匙
做法：梅菜以鹽水浸一會，切粒，加入葱/鹽/薑粒/蒜粒/糖/生抽/老抽/花雕酒/生粉/麻油/胡椒/1湯匙水拌勻；魚腩以鹽略醃逼出血水，沖水瀝亁；水滾，將梅菜鋪上鯇魚腩，蒸15分鐘。
★蘇玉華
爸爸有一味家傳秘製炒魷筒，將魷筒連埋啲墨汁炒到黑麻麻，原汁原味。一直以為淨係我屋企先係咁煮，後來發現一間西班牙餐廳都有得食，唔知我啲祖先係咪有西班牙血統呢？
墨汁炒魷（a）
價錢：$25/4人
需時20分鐘
材料：魷魚筒1隻、生蒜1粒（切碎）、熟蒜3湯匙、生抽1茶匙、雞粉1/4茶匙、花雕酒/糖/生粉各1/2茶匙、胡椒粉少許
做法：魷魚洗淨切圈，取膽囊唧出墨汁備用；將生抽/雞粉/花雕酒/糖/生粉/胡椒粉混入墨汁攪勻備用；燒熱鑊，下蒜茸後即落魷魚圈兜熟，然後倒入墨汁，慢慢煮至稠身，最後下熟蒜兜勻即成。
高鈞賢：
我媽咪煮嘢好叻，細細個我已經好鍾意食雞。加拿大嗰邊天氣較凍，媽咪成日煮栗子雞煲，好味之餘仲可以保持熱辣辣，食完成個人暖晒。
栗子雞煲（b）
價錢：$25/2人
需時：40分鐘
材料：雞髀2隻、栗子300克、冬菇3隻、紅蘿蔔100克、薑3片、葱1棵（切段）、油2湯匙
醃料：鹽1/2茶匙、糖1茶匙、生抽1湯匙、胡椒粉少許
調味：生抽2湯匙、老抽1湯匙、鹽1茶匙、冰糖30克、水2杯
做法：雞髀洗淨抹亁斬件醃好，泡油瀝油備用。栗子去殼，冬菇浸軟去蒂切條，紅蘿蔔去皮切小件備用。於瓦煲內燒熱油，爆香薑片，下栗子/冬菇/紅蘿蔔/雞件，以大火略爆炒，轉慢火，拌入調味料煮至汁稠，下葱段即成。
徐子珊：
女藝人要好注重均衡飲食，我比較喜歡食蔬菜。不過如果普通炒菜烚菜，又略嫌太寡。椒絲腐乳炒起嚟十分惹味，通菜又夠爽口，每次我都可以配到一大碗白飯㗎！
椒絲腐乳通菜（b）
價錢：$10/2人
需時：10分鐘
材料：通菜400克、指天椒1隻（切幼絲）、蒜茸2茶匙、油3湯匙
調味：腐乳3件、鹽1/4茶匙、糖1茶匙
生粉水：生粉1湯匙、水1/4杯
做法：通菜切段，將葉、莖分開，瀝水備用。燒熱油，下蒜茸略爆香後，放椒絲及拌勻調味料一同略兜煮，落菜莖爆炒至略軟後，下菜葉略炒，加少許水炒至菜熟透，再拌入生粉水即成。
胡諾言：
媽咪信觀音，每逢過年，必定帶我去圓玄學院拜神食齋菜。當中一定有芋頭魚。我細個覺得齋多數淡而無味，但呢條魚形狀特別，炸咗又好香口；用筷子夾開嗰陣，感覺零舍得意。
芋頭魚（b）
價錢：$10/2人
需時：30分鐘
材料：芋頭300克、麵粉/橄欖油/鹽/胡椒粉各少許、油適量
做法：芋頭去皮切細粒，隔水蒸10分鐘，取出壓成茸，加入鹽/胡椒粉。跟住落橄欖油/麵粉攪成漿，倒入魚狀模內，取出撲上麵粉炸5分鐘至金黃。
向海嵐：
女仔最鍾意食啲甜甜酸酸嘅嘢，平時屋企好少煮飯，不過一出街食飯，必點咕嚕肉，貪佢味道甜酸配合得相當好。
咕嚕肉（b）
價錢：$25/2人
需時：30分鐘（未計醃豬肉時間）
材料：脢頭肉200克、菠蘿2片、青椒/紅椒各1/2個、生粉3湯匙、雞蛋１隻、油適量
醃料：鹽1/2茶匙、生抽１茶匙、胡椒粉少許
汁料：茄汁/糖/白醋各2湯匙、生粉1湯匙、水1/4杯
做法：先將豬肉洗淨切細件，醃約30分鐘。豬肉蘸上蛋液後，撲上生粉，放入燒熱炸油內炸至金黃熟透，盛起瀝油。燒熱1湯匙油，爆香青、紅椒，下菠蘿及拌勻之汁料，中火煮至稠，將炸過的豬肉件回鑊拌勻汁料上碟。
★JackyYu
通常過年整嘅蘿蔔糕好嘥功夫同時間，於是我媽媽發明咗煎蘿蔔餅，將蘿蔔配搭自己喜好嘅材料，混入糯米粉和粘米粉生煎，方便又簡單；唔使過年都會食，媽媽每次整，我都當飯咁食㗎！
媽媽蘿蔔餅（c）
價錢：$40/6人
需時：30分鐘
材料：白蘿蔔2條、糯米粉450克、粘米粉300克、菜脯/瑤柱/蝦米/葱花各適量、雞湯2公升、冬菇6至8隻、臘腸1條、鹽少許
做法：白蘿蔔洗淨，刨皮切條，以雞湯煮腍，連湯待涼備用；菜脯洗淨切粒；瑤柱蒸熟撕成絲；蝦米浸軟；冬菇浸軟切絲；臘腸洗淨切片；將所有材料混入蘿蔔條和雞湯中，下鹽調味，加入糯米粉/粘米粉慢慢攪拌成稀糊狀。燒熱鑊，將適量蘿蔔漿舀入鑊，煎至兩面金黃即可；吃時可蘸上XO醬，味道更佳。
Jacky教路：糯米粉和粘米粉的最佳比例應為3:2；亦可以麵粉完全代替這兩種粉，煎出來的蘿蔔餅會較硬身，口感更脆。
楊婉儀：
我喺美國長大，好鍾意食薯仔，記得爸爸有一味拿手菜就係煎薯餅，薯仔刨絲煎到Pizza咁大，外面燶燶哋好香口，我日日放學都食一大塊。
美式煎薯餅（a）
價錢：$6/2人
需時：10分鐘
材料：薯仔2個、鹽1/4茶匙、糖1/2茶匙、黑椒碎/香草碎各少許、生粉2湯匙、葱粒適量
做法：將薯仔去皮刨絲，加入鹽/糖/黑椒碎/香草碎拌勻，生粉開水倒入，最後才放入葱粒；以少許油燒熱平底鑊，中火將薯餅兩面煎至金黃。
紀曉華：
我本身好鍾意番茄，偏愛甜酸。而且呢個係我第一個學識煮嘅菜，所以特別有感情。
番茄炒蛋（b）
價錢：$10/2人
需時：10分鐘
材料：番茄2個、雞蛋2隻（拂勻）、油2湯匙
調味：鹽1/4茶匙、糖1/2茶匙
做法：番茄去皮，切小件備用。燒熱油，落番茄炒，轉中火拌入蛋液及拌勻之調味料，炒勻至蛋剛熟透即成。
示範：怪師傅烹飪工作坊劉傑盛師傅（電話：23930622）（a）
食譜創作人邵寧子（嘉出版）（b）
囍宴廚．藝（私房菜）老闆JackyYu（電話：25756966）（c）
鳴謝：towngasavenue場地提供（電話：23672707）（d）