答問大會無悶場，deadair無在預期中出現，嘩，原來兩個人競選特首這麼好玩，有騷做才有進步，下屆無論有無普選（實無，信我啦），北大人一定要睇得開，容許多幾個人戥腳撐場，熱熱鬧鬧，千祈咪再學董先生自動當選繼續跳單人探戈，唔成事之餘，更要因為操勞過度（一支公跳全場喎）而中場腳痛落台。
什麼人才夠份量落場陪跑呢？
一、梁家傑話齋，有得揀至係老闆，各位老細做老闆做悶了，試吓反璞歸真做吓卒仔，做好呢份工。建議的人選眾多，十名之內的包括兩位田少、唐少（由唐媽做助選統籌）、霍家三位少爺仔、三位李公子和他們的老頭子。
二、女強人。今次余若薇唔選推梁家傑選，我認為是政壇最大的憾事。余大狀會在五年後出山嗎？到時拉埋陳四萬落場自己友玩埋一堆都唔錯。葉劉就肯定唔會執輸，實行「君臨天下」（我唔敢講母儀天下），空降選委會拉票日日做脫口騷演練，要把自己武裝成黃子華、林海峰、黃毓民和張無忌的綜合雌雄同體。不過她們最大的敵手，是民建聯全力推許的蔡蔡子，只要她突然搶攻向候選男對手問「咁你幾時同我生三個？」對方就算是口才出眾的曾蔭權，也會當場面青，眼神失焦，亂套失分，答唔答問都輸甩褲。