銅鑼灣百德新街名店一向係明星潮人入貨地，周倩圯以前係張玉珊修身堂旗下藝人，不過馮仁昭諗唔到佢兩個幫襯同一間時裝店之餘，仲搵埋同一個男人陪買衫！
相差五年同品味
事件發生喺百德新街嘅TSUMORICHISATO名店，張玉珊喺上星期六晚8點零鐘，由名模周倩圯嘅形象指導男友郭慶彬（Ricky）同大班助手職員陪同出現，七、八個人都算大陣仗。
當時張玉珊獨霸一間試身室，由店員輪流捧住一堆又一堆嘅新裝畀佢試，大半個鐘後，着白衫同短褲仔嘅張玉珊由Ricky同助手等拎住合共四大袋嘅戰利品離開，現場見張小姐成晚笑咪咪，睇嚟買得好開心。
TSUMORICHISATO係日本少女品牌，不過32歲嘅張玉珊係呢個品牌超級fans，27歲嘅周倩圯都一樣，所以Ricky陪完張玉珊後，第二晚同一時間又陪女友去同一間舖頭，但素顏上陣嘅周倩圯，真面目簡直「艷」驚四座，試着吊帶短裙嘅佢對住Ricky搔首弄姿，搞足成粒鐘，竟然兩手空空離開。
另外，早幾日黃浩然同擔任Twins形象指導嘅太太嘉嘉，一齊拍拖去百德新街嘅日本年輕品牌BEAMSBOY入貨，佢哋結婚至一年多，仲非常癡纏，最後嘉嘉買咗件短袖tee，走嗰陣佢搭住老公膊頭，兩個人邊講邊笑，之後仲肉緊到攬成脆麻花，真係煙韌到痹。
