新春期間，每天的節目是食、賭、瞓，造物者大概在華人的DNA中做了手腳，將賭放進了螺旋體中，炮竹一聲除舊歲，賭蟲甦醒，在基因中脫殼而出，令人心痕手癢，大人爭住做莊，小朋友忙不迭拆利是落注，初嚐人生如賭博滋味。
我到府上拜年，你到舍下拜年，大家寒暄一輪，三聲你好我好之後，開始你眼望我眼，煎一底蘿蔔糕、年糕、馬蹄糕只可頂多一陣，跟住又唔知講乜好，此時此刻，最幫到手的一定是麻雀、大細、啤牌、魚蝦蟹。
賭分兩種，一種係坐定定靜心地賭，這種賭需要思考、技術與運氣並重；要有起碼幾個鐘頭作戰術安排，逆風時只守不攻，順風時試試駛盡𢃇；要有好腳，大家好朋友趁新正頭試試技術運氣，贏了固然開心，輸了亦唔使㷫，因為過後多數有餐食，贏家自會安排飯局；要有限碼，若事先沒有講明注碼限制，肯定會越賭越大，及至輸到入肉失感情，不值得；要有好老婆，不需要自己有，起碼朋友有，朋友的好老婆管茶管水管消夜，去廁所有人戥腳，往往當晚的高潮亦由此起。這種衞生聯誼沙蟹局多數發生在占士震家中，謹此向阿震伉儷提供場地及飲食致謝。
另一種賭是游擊賭，即係玩，到誰家拜年看見有賭局便買多少，輸贏其次，氣氛最重要，隨時賭，隨時散，輸少少便當到冬季嘉年華買歡樂，贏少少便當好意頭發新年財，贏得太多反而困身，走人變成割禾青，新正頭無謂惹來詛咒聲。元宵一過，便應把賭蟲哄睡，一切歸於正常，努力工作，多勞多得，僥倖之心只存在過年時，其餘日子繼續腳踏實地捱騾仔。