喺佛羅倫斯要見到警察其實好難，可能當地天下太平治安好，所以企親喺街頭嘅，反而係交通警居多。基本上每隔兩條街就駐守兩名交通警，佢哋好惡㗎，有咩車駛嘅路線唔啱、亂咁泊位，佢哋會即刻狂鬧啲司機，仲要無人敢駁佢哋嘴！喺市中心仲多，每個街口就有4、5個駐守，咁治安警察去晒邊呢？
文、攝：TigerL
差人做嘢唔俾影相
小記有日咁好彩就遇到「警察追人鬧」事件嘞！雖然唔知發生咩事，只係突然有兩名人士飛奔似箭咁跑過小記身邊，然後聽到前面有兩名着深藍色制服嘅警察，上氣唔接下氣咁邊跑邊大叫，追住剛才擦身而過嘅人，但疑犯跑快過佢哋成條街，追鬼咩！跟住無耐就聽到遠處有警車聲，小記梗係撲埋去八卦啦，突然有兩名穿着白色制服的人揸住部寶馬電單車飛出嚟，狂追前面嘅疑犯，一睇就知係交通警，話咁快就追到嗰兩個疑犯，兩名交警好有型咁落車，其中一位仲係女性㖭！小記諗住舉機拍低此情此景時，即刻俾佢哋攔住，無得影事發經過，惟有影佢哋架BMW戰車，紀念當日嘅情景啦！佢哋架戰車無香港啲咁累贅，香港嘅BMW警察電單車馬力係850c.c.，不過全車加晒裝備，大大嚿唔夠型仔，反而意大利嘅警車輕身瀟灑得多，顏色配搭仲係小記最鍾意嘅㖭！