呢排賣行廣告嘅PCCW講明7月貫通地鐵沿線，個個網友買定WiFi等呢日，據知實情，官方呢個「貫通」，其實係得港島及部份九龍線嘅……大堂、月台有得玩，地鐵車廂係無得玩喎。吓，地鐵好似唔建議乘客企響月台或大堂咁耐喎，阻塞通道嘛，咁搞法，點玩呀？最慘仲係拎住部Notebook玩WiFi，冇櫈坐，左手托住2磅重電腦，右手上網，到時上網Download個檔案，真係要踎、企、挨、坐樓梯……乜招都出埋，都幾煩㗎。
記者：陳國輝
攝影：何家亮 ImageGirl：Ceci
優點
等人/無聊/攝時間一流
「又話通晒地鐵沿線，連列車入面都上唔到WiFi？個廣告呃人㗎！」咪嬲住，先話你知WiFi有乜特徵，其實同一般無線傳輸例如藍芽、紅外線一樣，佢覆蓋距離可達到30至100米，只要夠近，Connect能力就越高；最大問題係WiFi唔可以跨點連接，離開範圍即刻斷線，都幾殘忍！只要你清楚呢點，就會明白搭緊車無可能用到WiFi，就算廣告讚到識飛都冇用，你信，只不過你無知。
知道覆蓋範圍得地鐵大堂同月台，有乜解救？雖則玩家們最初嘅如意算盤已經幻滅，但講到底，地鐵就好似你屋企樓下嘅公園仔咁，返工放工實經過，日日陪伴你成長，就當你每日利用等車嗰3分鐘（約下載2MB）CheckEmail或Send份文件，大概冇難度；甚至乎企喺「7仔」、恒生ATM等朋友嗰陣，仲可以乘機上網，或者玩MSN同人吹水，攝吓時間不知幾好使，當然，咁短時間用嚟搵資料就冇乜可能。
缺點
冇位/冇插蘇/入車廂即斷
請恕小記見識淺薄，來來去去玩WiFi嘅地方，唔係酒店就係Cafe兩處地方。以前從未諗過喺地鐵站上網會係點，𠵱家終於有咗答案：首先，地鐵站人來人往，莫講話搵個位坐艱難，就算企喺度等人亦覺辛苦，點及得喺Cafe坐大班椅梳化，再歎杯Espresso或者IcedCaramelMacchiatto咁舒服？講實際啲，當你每秒上落十幾萬，冇閒情去Cafe慢慢Relax，呢個情況其實喺地鐵站上網就最快捷，但有冇發現，原來大堂以及月台都冇提供插蘇位，若然單撈緊一個重要Document，Notebook突然冇電Cut埋線，咁點算？當然，地鐵站同Cafe冇得揮，但既然一早歎慣晒，又點捨得搞到身水身汗先！
無線上網 拼一拼
WiFi（8Mbps）最平最快
收費：$78每月無限上網
（香港寬頻、PCCW）
評價：幾類無線上網方式嚟講，WiFi具8Mbps算速度最快，唔使逐KB容量計，收費最抵；但技術上佢唔可以跨點上網，必須停留於某一範圍之內，限制好大。
HSDPA（3.6Mbps）流動性強
收費：$100/50MB-$488
無限任玩（Smartone）
評價：接收到3G嘅地方，邊搭車邊玩根本唔係問題，甚至跨區、漫遊到其他國家亦暢通無阻；暫時嚟講比較少手機支援，雖然有數據卡直插落Notebook，但價錢唔平。
EDGE（236.8Kbps）覆蓋率高
收費：$68/10MB-$128
無限任玩（Peoples）
評價：收費方式同HSDPA相似，逐KB容量計算，而且配備EDGE功能嘅2.5G手機相當普及，覆蓋率高；但傳輸速度就係3種入面最慢，得236.8Kbps，約HSDPA嘅十五分一。
頂住先！28個Hotspot免費試玩
點解一直冇提過地鐵站入面嘅上網表現？唔怕講，PCCW話𠵱家仲未動工，即係未有得試；想拿拿臨玩WiFi，最近香港寬頻就推出咗「bbWI-FI」免費試玩，直到4月30日為止，大家可於全港28嗰Hotspot，包括麥記、PacificCoffee、大型商場及指定食肆玩到，到𠵱家你仲未知WiFi係咩一回事，快啲試吓！
WiFi友須知 4大玩法
睇趨勢，WiFi肯定係未來IT界重要指標，潮人唔識用遲早Out出局，現時究竟有幾多種玩法，即掃！
NDS上網對抽
咪誤會以為係隔幾米遠嗰隻WiFi對戰，NDS其實支援上網同鬼佬或㗎仔互抽，例如Hit近一年半嘅賽車遊戲《MarioCart》，上網連接Server即可選擇對手。
PSP睇串流電影
好多人唔只用PSP打機咁齋，自從可以上網之後，用佢睇VideoStreaming嘅玩家特別多，貪佢機身細部得嚟仲具備4.3"芒，而且顏色仲鬼咁Sharp，唯一係唔支援TouchScreen窄少少。
PDA裝VolP傾偈
現時有部份機種已內置Skype軟件，就算冇，電話網絡商或者上網都免費單撈到，好處係傾漫遊勁慳錢，一筆月費就搞掂，同埋WiFi速度比一般GPRS都快，唔驚話音會Delay。
Notebook
瓣瓣掂
唔使分析，Notebook一定跑贏其他Device，以上講得出嘅功能佢都有，仲加埋上網瀏覽Website㖭！雖然有部份機種已經降至1kg樓下，但好多人依然覺得佢Oversize，懶得拎出街。
WiFi友兜番：香港已經好好！
幾乎每月出Trip公幹嘅阿Dee，例牌Notebook傍身，隨時Send文件返公司向老闆交差；不過佢歎息話：「你以為香港WiFi好差咩？其實唔錯㗎喇！佢只係Hotspot少咗啲，但計番使用人數又唔多，只要搵到地方Online，速度可以好流暢；相反，外國人好興玩WiFi，但係Hotspot數目未能夠滿足所有玩家，隨時仲要搶線爭餐死！」
