★喪Do男Leo
細個嗰陣因為成日喉嚨痛，阿媽好少會煮一啲既辣又熱氣嘅嘢，薑又辣又熱氣，所以只會喺一啲特別日子先煮，好似考完試之後，甚至生日都係煮呢個菜賀壽，所以我見到呢道菜會開心過見生日蛋糕，𠵱家食番都好有回憶。仲有，平時去食飯好多人都會爭晒啲肉嚟食，不過喺屋企就唔會，因為阿爸、家姐同我會搶薑絲食，好多時剩番晒啲肉㖭！
薑絲炒豬肉（g）
價錢：$10/2人
需時：10分鐘
材料：豬肉4両、薑1塊
調味：鹽1茶匙、油1茶匙、生粉1/2茶匙、生抽1茶匙
做法：1.薑洗淨後切絲備用。
2.豬肉洗淨後用油、生粉、生抽先醃，然後剁碎。
3.最後將薑絲和豬肉一齊落鑊加鹽兜勻即成。
★有耳非文
有次去台灣一間坐月中心探朋友，竟然俾我發現咗呢道菜。本身我好鍾意食牛肉同飲紅酒，呢個菜真係啱晒我。見朋友啱啱生完要補一補，通常都會係豬腳薑，不過唔係咁易喺屋企煮得到，一煮又要煮一大煲。紅酒燉牛柳就好易煮，而且紅酒補血，牛肉又有鐵質，啱晒生完BB嘅女人。
紅酒燉牛柳（g）
價錢：$40/2人
需時：35分鐘
材料：牛肉1/2斤、紅蘿蔔1條、洋葱1個
調味：紅酒1杯、水1杯、鹽1茶匙
做法：
1.將紅蘿蔔和洋葱切粒，然後落鑊爆香。
2.加入牛肉粒一齊兜勻至半熟。
3.最後加入調味，再燉半小時即成。
DJ阿喱
喺外邊食到嘅魚香茄子係假嘅，好多都無魚香味，只有我阿媽煮嘅至係堅嘢！我好鍾意食魚香茄子，但係次次出街食飯都食唔到有鹹魚味，世上只有媽媽好，佢煮嘅至會用鹹魚。
魚香茄子（g）
價錢：$15/2人
需時：10分鐘
材料：茄子2條、豬肉4両、鹹魚2両、豆瓣醬1/2茶匙、蒜茸2茶匙、紅椒絲1/2茶匙、生抽1/2茶匙、老抽1/2茶匙、蠔油1茶匙
做法：
1.茄子先用油爆，然後用水煮一煮。
2.用蒜茸起鑊，放豬肉碎炒香，再加茄子、鹹魚、豆瓣醬及紅椒絲再略炒。
3.最後放蠔油、生抽及老抽再煮即可。
姚樂怡
最近在加拿大剛回港的姚樂怡，馬上又接拍無綫新劇《願來是有機》：「工作越忙就越想搵好嘢食！最愛是辣子蟹，避風塘式蒜辣粒，入口麻辣，最正是炒過的蟹油，用嚟撈飯食最一流！」
辣子蟹（f）
價錢：約$100/3人
需時：30分鐘
材料：肉蟹1斤、花椒1/2両、辣椒亁1斤、蝦醬/蜆蚧/蝦米茸各1湯匙、薑片/葱/生粉/鹽/麻油/辣椒油/荔枝醋各少許、油適量
做法：
1.肉蟹洗淨切件，面上生粉、鹽；大滾油下薑片，將肉蟹件炸煮至6成熟，撈起備用；
2.花椒、辣椒亁、蝦醬、蜆蚧、蝦米茸等調味香料同下油鑊爆香；蟹件回鑊加葱炒至全熟。
3.最後將麻油、辣椒油及荔枝醋撒面略炒，助以提味。
鄧健泓
久未露面嘅鄧健泓，最近正密鑼緊鼓預備推出新碟。講到至愛嘅家常菜，佢最愛梅菜蒸豬肉，「記得細個時係嫲嫲煮畀我食，次次可食2、3碗飯，𠵱家喺街食必落味精，好難食到嗰份家的風味。」
梅菜蒸豬肉（e）
價錢：$13/2人
需時：13分鐘
材料：甜梅菜4両、脢頭豬肉6両。
調味：生粉/糖各1/2茶匙、蠔油1茶匙、油/生抽/老抽/鹽/油各少許
做法：
1.甜梅菜先細切，撈油及糖各少許，炒3分鐘待其入味。
2.脢頭肉切片、洗淨、待其收亁水，再放入甜梅菜及調味撈勻。
3.熱爐蒸10分鐘即成。留意時間宜長不宜短，時間越耐，梅菜味更入豬肉，梅菜則更爽口美味。
★李純恩
呢個菜成日都會掛住，幾乎隔餐就會煮，一來好易煮；二來好送飯。我好鍾意教朋友或者菲傭做，真係好簡單，一教就明。百葉好易索到個汁，一放入飯度真係無得彈。每次食呢個菜，我都好有回家嘅感覺。
百葉炒肉絲（g）
價錢：$10/2人
需時：8分鐘
材料：百葉4塊、豬肉4両
調味：生抽2茶匙、紹酒1/2茶匙、水1/2杯
做法：
1.先用暖水浸腍百葉，然後切絲備用。
2.豬肉洗淨後切絲備用。
3.待鑊熱後將百葉和肉絲加入，然後加生抽、水和紹酒兜勻便可。
文頌嫻
講起文頌嫻，令人聯想起溫文爾雅、大家閨秀一類角色，不過都好耐冇見，原來佢正秘密練兵，開拍民初電視劇。文女都自認為食之人，講到至愛非常另類，竟是海南雞飯：「每次過泰國玩一定去食，冇骨、滑溜，個點雞醬汁做得特別好味，最正係佢個油飯，真係雞味香濃。」
海南雞
價錢：$40/4人
需時：30分鐘
材料：雞1隻、鹽適量、薑1塊、蒜頭2個
做法：
1.先將蒜頭和薑塞進雞中，然後在雞的外皮搽上一層鹽。
2.待鹽水滾後，將雞放入水中浸5分鐘，撈起過冷河，然後重複動作至浸熟。
3.撈起風亁即成。
張苡澂
認識張苡澂主要由廣告開始，佢將在5月推出新碟。由北京電影學院表演系來港嘅佢，首次食水煮魚就馬上愛上：「以前怕魚味腥，不過水煮過可去除腥味，最重要係辣對皮膚好。」
水煮魚片（f）
價錢：$90/4人
需時：20分鐘
材料：桂花魚1條（約2斤）、豆瓣醬2湯匙、麻辣醬1湯匙、生抽1/2湯匙、老抽1/3湯匙、水4両、芽菜/薑/生粉水/油各少許、花椒粉/辣椒粉/辣椒亁/蒜茸各少許
做法：
1.芽菜汆水放碟底；魚片走油至6成熟。
2.熱油鑊下薑、蒜茸及豆瓣醬加水煮滾，放入生抽、老抽、麻辣醬；魚片回鑊煮至全熟，埋生粉芡後上碟。
3.面放花椒粉、辣椒粉、辣椒亁及蒜茸，灒油後即可。
（e） 海景嘉福酒店海景軒梁輝雄中菜總廚（電話：27312883）
（f） 雲陽閣川菜館蕭金城廚房副主管（電話：23750800）
（g）沙田周記避風塘梁師傅
（電話：26280218）